Kristinn H. Gunnarsson, ritstjóri Vestfirðings og fyrrverandi alþingismaður rifjar upp í blaði sínu í dag að svik útgerðarinnar við Vestfirði séu og verði svæðinu dýrkeypt og algerlega í takti við skýrslu Hagfræðistofnunar um misjafnan hagvöxt landshlutanna á Íslandi.
Hann minnir á að í janúar verði 19 ár liðin frá því Hrönn rann inn í Samherja og Guðbjörg ÍS hafi horfið úr flota Vestfirðinga. Þau svik, eins og Kristinn kallar gerninginn, hafi reynst heimafólki dýrkeypt: \"Ætla má að samanlagður úthlutaður kvóti skipsins á þessum 19 árum sé ekki undir 75.000 tonnum, líklega þó meiri. Áætla má að útflutningsverðmæti aflans miðað við hagskýrslur fyrir árið 2014 hafi verið um 30 milljarðar króna,\" skrifar Kristinn til að útskýra fyrir lesendum hvað hafi verið í húfi, en þess utan hafi fjölmargir tapað vellaunuðaðri vinnu beint og óbeint og umtalsverð þjónusta í landi við skipið hafi lognast út af: \"Þrjátíu milljarða króna velta hefur margfeldisáhrif þegar hún fer um hagkerfi útgerðarstaðarins,\" skrifar hann.
Svo rifjar hann upp svikin: \"Við samrunann var gert munnlegt samkomulag milli ísfirskra eigenda skipsins og forsvarsmanna Samherja þess efnið að skipið yrði áfram gert út frá Ísafirði. Því var mátulega trúað að það yrði efnt og til þess að róa Ísfirðinga gaf forstjórinn Þorsteinn Már Baldvinsson út þá yfirlýsingu í útvarpi að Guggan yrði áfram gul, hún yrði áfram ÍS og að hún yrði áfram gerð út frá Ísafirði. Það var allt svikið, hvert einasta orð. Það stóð ekki steinn yfir steini, það kom í ljós að aldrei stóð til að efna heiðursmannasamkomulagið, né heldur opinberu yfirlýsinguna,\" skrifar Kristinn og heldur þétt á penna.
Hann segir vanefndirnar hafa reynst Vestfirðingum dýrkeyptar: \"Þegar mikil velta hverfur úr litlum samfélögum verður það mikið högg. Við þetta bættist að Básafellskvótinn og Ósvararkvótinn í Bolungavík fór að mestu á þessum tíma. Það veikti undirstöður atvinnulífsins svo að ekki hefur verið bætt. Þetta var Samherjamönnum ljóst. Þeir gátu gert skipið út frá Ísafirði eftir sem áður en gerðu ekki. Þeir kusu að styrkja byggð á öðrum stað. Vestfirðingarnir sitja eftir með skaðann af aðgerðinni í formi lægri launa, færri starfa, færra fólks, minni þjónustustarfsemi og hruns í húsnæðisverði,\" skrifar þingmaðurinn fyrrverandi og segir að fyrir bragðið komi skýrsla Hagfræðistofnunar Háskóla Íslands um misjafnan hagvöxt eftir landshlutum ekki á óvart, enda sé hann í tilviki Vestfjarða af mannavöldum.
