Kristinn Björnsson, fyrrverandi forstjóri Skeljungs er fallinn frá á 66. aldursári eftir skammvinn veikindi, en hann var um langt árabil áberandi í íslensku viðskiptalífi.
Kristinn fæddist í Reykjavík 17. apríl 1950, sonur Björns Hallgrímssonar forstjóra og Emilíu Sjafnar Kristinsdóttur húsfreyju. Hann varð stúdent frá MR 1970 og lauk lögfræðiprófi frá Háskóla Íslands 1975 Hann starfaði sem lögfræðingur hjá borgarverkfræðingi Reykjavíkurborgar 1975-1976 og rak lögmannsstofu ásamt Gesti Jónssyni hrl. og síðar Hallgrími B. Geirssyni hrl. frá 1976-1982.
Kristinn varð forstjóri Nóa-Síríusar og Hreins hf. árið 1982 og gegndi því starfi til 1990 er hann var ráðinn forstjóri Skeljungs. Kristinn lét af störfum hjá Skeljungi að eigin ósk haustið 2003. Frá árinu 2005 var hann einn eigenda fyrirtækisins Líflands ehf. og starfandi stjórnarformaður þess.
Kristinn sat í stjórnum fjölda fyrirtækja, eins og hjá H. Benediktssyni, Nóa-Síríusi , Sjóvá, Eimskip, Haraldi Böðvarssyni hf., Hraðfrystihúsi Eskifjarðar, Hans Petersen, Plastprenti, Straumi fjárfestingabanka hf. og Líflandi ehf.
Eftirlifandi eiginkona Kristins er Sólveig Pétursdóttir, fv. þingmaður Sjálfstæðisflokksins, dómsmálaráðherra og forseti Alþingis og eignuðust þau þrjú börn.
