Inga Sæland, formaður Flokks fólksins skrifaði aðsenda grein er nefnist „Karlar sem hatast við konur“ í Morgunblaðið í morgun. Þar svarar hún gagnrýni Karls Gauta Hjaltasonar og Ólafs Ísleifssonar, fyrrverandi þingmanna flokksins og Halldórs Gunnarssonar, sem sat í stjórn flokksins, og slær hvergi af.
Inga segir það kaldhæðnislegt að Ólafur hafi á dögunum fullyrt að mikil orðsporshætta stafi af því hvernig skipan mála flokksins sé háttað. „Þarna talar maður sem nýverið hefur fullkomlega að eigin frumkvæði og hvötum eyðilagt eigið orðspor sem stjórnmálamaður með því að taka þátt í samsæri sem hefur kastað rýrð á æru þings og þjóðar. Ólafur Ísleifsson og Karl Gauti Hjaltason félagi hans eru nú farnir í sögubækurnar sem fyrstu þingmenn lýðveldissögunnar sem eru látnir sæta ábyrgð fyrir gjörðir sínar með því að þeir eru reknir úr sínum eigin flokki fyrir afbrot sín. Engir nema þeir sjálfir frömdu þau ótrúlegu afglöp að fara til samsærisfundar við stjórn flokks pólitískra andstæðinga Flokks fólksins á Klaustur Bar,“ segir Inga.
Um brottvísun Ólafs og Karls Gauta úr flokknum segir Inga að þeir hafi aðeins átt eitt erindi á Klaustur Bar þetta kvöld og að þeir hafi vitað mætavel hvað til stóð, að fá þá til að ganga í Miðflokkinn. „Þeir voru að svíkja flokkinn sem kom þeim á þing. Er uppvíst varð hvað þarna hafði farið fram átti stjórn Flokks fólksins engan annan kost en að fara fram á afsögn þessara tveggja þingmanna. Þegar þeir urðu ekki við því þá var þeim vikið úr flokknum og sviptir öllum trúnaðarstöðum á hans vegum. Þeir höfðu með gjörðum sínum báðir fyrirgert öllu trausti,“ segir Inga.
Svarar gagnrýni um fjármál flokksins
Karl Gauti, Ólafur og Halldór hafa m.a. gagnrýnt hvernig staðið er að fjármálum flokksins og að Inga hafi verið gjaldkeri og prókúruhafi flokksins.
Hún segir einfalda skýringu fyrir því að hún hafi verið prókúruhafi og gjaldkeri og að fjármál flokksins séu með besta móti. „Flokkur fólksins er rétt tveggja og hálfs árs gamalt stjórnmálaafl. Lengst framan af barðist þessi hreyfing í bökkum fjárhagslega enda að upplagi mestan part stofnuð fyrir mitt frumkvæði af fátæku fólki, öryrkjum og öldruðum til að berjast gegn örbirgð og misrétti í okkar ríka landi. Sem formaður hef ég í fullu samráði við stjórn þurft að gæta ýtrustu ráðdeildar þar sem öllu skiptir að hafa fullkomna yfirsýn frá degi til dags. Þetta hefur tekist farsællega. Flokkurinn býr nú við heilbrigðan fjárhag. Hann er skuldlaus og slíkt er afar fátítt meðal íslenskra stjórnmálaflokka í dag,” segir Inga.
Hún bætir við: „Reikningar flokksins hafa aldrei hlotið athugasemdir endurskoðenda og þeim hefur verið skilað í samræmi við lög og reglur. Þeir hafa ávallt verið opnir öllum stjórnarmönnum, líka Karli Gauta Hjaltasyni. Halldór Gunnarsson sat í stjórn og þriggja manna fjárhagsráði flokksins, var með aðgang og eftirlitsheimild að heimabanka flokksins. Hann undirbjó ársreikninga ásamt gjaldkera í hendur löggilts endurskoðanda. Halldór Gunnarsson vissi um öll fjármál Flokks fólksins frá A til Ö. Það er aumt að horfa upp á Halldór, Karl Gauta og Ólaf í hefndarleiðangri nú þar sem þeir reyna að sá fræjum efasemda og tortryggni um fjármál Flokks fólksins um leið og þeir vita betur.“
