Hvert fara og hver notar allar þær persónuupplýsingar sem við deilum með öðrum t.d. á Netinu? Nýjar hættur og ógnir við vinnslu og meðferð persónuupplýsinga má sjá í nýrri ársskýrslu Persónuverndar en framundan er innleiðing tímamóta lögggjöf í Evrópu sem verndar einstaklinga betur gagnvart gagnasöfnun á netinu um þá.
Í skýrslunni segir meðal annars að tæknibylting í stafrænu upplýsingasamfélagi hafi umbylt því hvaða persónuupplýsingum er safnað, í hvaða tilgangi og hvernig er farið með þær. Internet allra hluta með snjalltækjanotkun fremsta í flokki hafi opnað fyrir þann möguleika að kortleggja velflestar athafnir fólks.
Helga Þórisdóttir, forstjóri Persónuverndar segir að rétturinn til að gleymast verði innleiddur árið 2018 og vísar þar í að „netið gleymir engu“, eins og sagt er. Þá tekur gildi ný löggjöf sem mun styrkja einstaklinga gagnvart söfnun persónuupplýsinga og opinberum gögnum verði til dæmis skylt að eyða skaði þau hagsmuni fólks að ósekju. Helga minnir þó á að eð snjallsímum og notkun vinsæalla forrita sé allt kortlagt sem þú hugsar og gerir og þessar upplýsingar séu seldar á milli fyrirtækja. Ný löggjöf á að vinna gegn því að þriðji aðili noti sér persónuupplýsingar sem honum voru ekki ætlaðar.
Helga segir að meðfram nýjum lögum sem verða innleidd hér verði auknar skyldur lagðar á herðar fyrirtækja um meðferð gagna um einstaklinga og sektarákvæði sett í reglurnar.
Nýjar hættur og ógnir steðja að vinnslu og meðferð persónuupplýsinga. Málafjöldi Persónuverndar hefur nærri þrefaldast frá árinu 2002. Á árinu 2015 var stofnunin með 1.961 mál til meðferðar, segir á vefsíðu stofnunarinnar.
