Íslendingar geta hætt að berja sér á brjóst vegna árangurs í jafnréttismálum kynjanna ef þeir skoða hverjir ráða ennþá nánast öllu í fjármálakerfi landsins. Þetta kom fram í þættinum Ritstjórarnir á Hringbraut í gærkvöld.
Þórður Snær Júlíusson ritstjóri Kjarnans, sem var annar tveggja gesta Sigmundar Ernis í þætti kvöldsins segir þar að vefmiðillinn hafi á undanliðnum tveimur árum gert úttekt á því hverjir raunverulega stjórni fjármálakerfi landsins, þ.e.a.s. ráði fjármálastofnunum og sitji í stjórnum þeirra sjóða sem ráði yfir mestu fjármagni í landinu og þar með lánastýringunni í samfélaginu. Í ljósi komi að af 87 helstu stjórnendum banka, annarra fjármálafyrirtækja og lífeyrissjóða séu 80 karlar og sjö konur. Og þarna sé helstu völdin í viðskiptalífinu að finna - og hvergi annars staðar; þeim peningum sem komið hafi verið fyrir í öllum þessum fyrirtækjum og sjóðum fylgi gríðarleg áhrif og völd sem móti að verulegu leyti samfélagsgerðina. Ef horft sé til helstu stjórnenda stærstu fyrirtækja landsins sé hlutfallið líka áþekkt; þar séu átta af hverjum tíu stjórnendum karlmenn.
Í þættinum bendir Þórður á að það sé aðeins þegar kemur að stjórnum fyrirtækja og stjórnarformennsku sem hlutfallið hafi lagast heldur á síðustu árum - og það sé auðvitað til komið vegna þvingunaráhrifa reglna og laga. Þessi breytta kynjasamsetning í stjórnum fyrirtækja hafi hins vegar haft mjög góð áhrif á ákvarðanatöku innan þeirra; flest af þeim séu orðin mun samfélagslega ábyrgari en áður og fjárfesti mun síður í verkefnum sem halli á ákveðna hópa innan samfélagsins. Karlmenn séu nefnilega áhættusæknari og sýni af sér meira skeytingarleysi en konur þegar komi að stjórnun fyrirtækja eins og dæmin sanni, en konur séu almennt varkárari og vilji vanda sig betur við stjórnunina. Fyrirtækjum sé því einfaldlega hollt að ráða til sín fleiri kvenstjórnendur.
Hann bendir til á að ríkisvaldið þurfi sjálft að taka sér ærlegt tak í jafnréttismálum kynjanna. Hrunið hafi bitnað harðar á konum en körlum, en þar eð þær séu mun fjölmennari í röðum opinberra starfsmanna þar sem harðast hafi verið gengið fram með niðurskurðarhnífinn hafi enn frekar hallað á þeirra hlut á síðustu árum. Þar fyrir utan dragi ríkið helst lappirnar þegar komi að því að rétta hlut kvenna í hópi æðstu stjórnenda. Allir þrír yfirmenn Seðlabankans séu karlar, svo dæmi sé tekið - og raunar komi karlar öðru fremur að öllum helstu ákvörðununum innan valdamestu stofnana samfélagsins.
Ritstjórana er hægt að nálgast í heild sinni á hringbraut.is og eins klippur úr honum.
Horfa á klippur úr þætti kvöldsins hér:
