Erlendar rannsóknir sýna að stytting vinnuvikunnar geti stuðlað að aukinni atvinnuþátttöku kvenna og dregið úr því að konur sæki í hlutastörf, auk þess að það gæti stuðlað að því að það jafnist ábyrgðin á svokölluðum ólaunuðum störfum, heimilis- og umönnunarstörfum.
Þetta segir Sonja Ýr Þorbergsdóttir, lögfræðingur BSRB, í samtali við mbl.is, en bandalagið barist fyrir styttingu vinnuvikunnar allt frá árinu 2004 og á miðvikudag stóð bandalagið fyrir málþingi um efnið ásamt Reykjavíkurborg. Sonja hélt þar erindi, sem fjallaði um það hvernig stytting vinnuvikunnar gæti aukið jafnrétti kynjanna á vinnumarkaði og innan heimilisins.
Fram kom í erindi Sonju að fjöldi kvenna á íslenskum vinnumarkaði væri í hlutastörfum, eða 37% kvenna á móti einungis 16% karla. Þegar konur væru spurðar að því hvers vegna þær væru í hlutastörfum, væri algengasta uppgefna ástæðan sú að það væri vegna fjölskylduábyrgðar – ábyrgðar á ólaunuðum störfum innan veggja heimilisins, umönnun barna og hjúkrun aldraðra. Algengasta svar karla í hlutastarfi var hins vegar það að þeir fái einfaldlega ekki fulla vinnu.
Sonja segir þessa staðreynd rýra tekjumöguleika kvenna og starfsþjálfunartækifæri, en meðalatvinnutekjur kvenna á Íslandi eru einungis 72,5% af meðalatvinnutekjum karla, þegar ekki er leiðrétt fyrir vinnutíma, en konur vinna að meðaltali styttri vinnuviku en karlar, 34,4 klukkustundir á móti 42,3 klukkustundum.
