Bergið Headspace er stofnað af Sigurþóru Bergsdóttur og Dr. Sigrúnu Sigurðardóttur, lektor við heilbrigðisvísindasvið Háskólans á Akureyri. Með stuttum fyrirvara kom það í ljós að ríkisstjórnin mun styrkja verkefnið um 60 milljónir króna yfir tveggja ára tímabil, með það fyrir augum að koma því af stað, og var skrifað undir samning þess efnis á föstudaginn.
Um er að ræða þverfaglegt móttöku- og stuðningsúrræði fyrir ungt fólk sem glímir við andlega vanlíðan af hverju tagi. Sigurþóra er gestur Lindu Blöndal í frétta- og umræðuþættinum 21 á Hringbraut í kvöld, þar sem hún ræðir úrræðið nánar.
„Bergið Headspace er úrræði sem byggir á þeirri hugmyndafræði að við séum að horfa á fyrsta stigs þjónustu fyrir ungt fólk, sem byggir á þeirri grunnhugmynd að allir eigi rétt á því að hafa einhvern til að tala við. Geta leitað og fengið ráðgjöf og fengið eyra, fengið stuðning við því sem verið er að takast á við. Þetta byggir á hugmyndafræði, að hluta til, sem er kennd við þetta „Headspace“ sem byrjar í Ástralíu, þar sem að stofnandinn, sem var með okkur á föstudaginn, ótrúlega skemmtilegur, hann Patrick McGorry, er í raun og veru að segja: „Nú setjum við ungmennin fyrst og reynum að finna út hvernig við getum stutt þau og kerfin fyrir aftan.“ Og í raun veru líka þeirri hugmyndafræði að það að vera ung manneskja er kannski svolítið sérstakt æviskeið. Það að vera 12-13 og upp í 25 ára, þá ertu ekki endilega barn lengur og hentar kannski ekki lengur í barnaúrræðin og svo ertu ekki heldur orðinn fullorðinn og hentar ekki í fullorðinsúrræðin. Að við séum að búa til eitthvað sérstakt fyrir þennan hóp skiptir máli,“ segir Sigurþóra.
Úrræðaleysi gagnvart ungu fólki
Sonur hennar, Bergur Snær, féll fyrir eigin hendi aðeins 19 ára gamall. Sigurþóra segir að hún hafi persónulega upplifað mikið úrræðaleysi gagnvart ungu fólki og því hafið vinnu við að stofna Bergið Headspace. „Ég er búin að upplifa það í svolítinn tíma og hef verið að skoða málin. Við ákváðum að stofna þarna samtök í haust, í september, og þá fórum við að skoða það fyrir alvöru hvað í raun og veru vantaði. Það er gríðarlega mikið af góðum úrræðum, ekki síst ýmis konar virkniúrræðum sem hafa komið fram og Virk hefur auðvitað verið að styðja slík úrræði gríðarlega mikið. Það er mjög mikið af góðum ýmis konar úrræðum í gangi. Svo erum við með heilbrigðiskerfi og þar erum við bæði með barna megin og svo fullorðins megin. Svo erum við með SÁÁ með fíknimálin. Þannig að það eru auðvitað mjög mikið af úrræðum í gangi og mjög góðum lausnum og mikið af frábæru fagfólki sem er að vinna flotta vinnu.“
„Það sem kannski vantaði var þessi aðgengileiki ungs fólks. Rannsóknir sýna að þetta virðist vera alþjóðlegt mál, að þessi hópur nýtir sér ekki þjónustu. Þau leita sér ekki hjálpar, koma ekki inn í kerfið fyrr en það er allt komið til andskotans, ef svo má segja. Þannig að það að ná að búa til stað sem er öruggur, þar sem það þarf ekkert að heita eitthvað, hvað er að: „Mér líður illa, ég lendi í einelti í skólanum, ég á í erfiðleikum í samskiptum við fjölskylduna mína, kannski er ég gay eða trans,“ hvað það er sem er í gangi á þessum tíma vegna þess að það gerist allt á þessu aldursbili. Það muna það allir, það gat verið svolítið erfitt að vera á þessum aldri,“ bætir hún við.
Eins og eitthvað meira sé að stýra okkur
Í ferlinu öllu segir Sigurþóra að sér hafi fundist þau ekki vera alveg ein. „Það er eiginlega mjög erfitt að útskýra þetta en mér líður mjög mikið eins og ég sé ekki algjörlega sjálfráða, eins og það sé eitthvað annað sem er að stýra. Það hefur verið í gegnum allt þetta ferli, okkur finnst það að það sé eitthvað meira sem er að stýra okkur, við upplifum það mjög sterkt“ segir Sigurþóra að lokum.
Nánar er rætt við Sigurþóru í 21 í kvöld. Þátturinn hefst klukkan 21:00.
