Valgerður Reynisdóttir, 15 ára afgreiðslustúlka hjá Krónunni, varð fyrir kynþáttafordómum þegar hún var við störf á dögunum. Þá kallaði eldri maður hana n-orðinu. DV.is greinir frá.
Að sögn Valgerðar, sem flutti hingað til lands 10 mánaða og lítur fyrst og fremst á sig sem Íslending, kom maðurinn að afgreiðslukassanum og tók henni fálega, heilsaði ekki og lét eins og hún væri ekki til. „Ég sagði „góðan daginn“ og hann svaraði ekki. Svo þegar hann er að fara sagði ég „takk fyrir og eigðu góðan dag,“ segir Valgerður í samtali við DV. Svo spurði hún hvort það mætti bjóða manninum afritið en hann svaraði að bragði á ensku: „Not from you n****r.“
Valgerður kveðst hafa verið brugðið og spurði manninn hvort hann hafi í alvöru látið þessi orð falla. Hann hafi ekki svarað og rokið út. Hún segist hafa lent í fordómum en að hún hafi ekki verið kölluð n-orðinu áður. Það hafi verið áfall að heyra þetta og leiðinlegt.
„Ég hef verið að kynna mér hvað þetta virkilega þýðir og besta lýsingin á þessu orði er þegar hvíti maðurinn, þegar þrældómurinn var í gangi, þá þýddi það, ég er betri en þú, ég er æðri en þú og þú ert undir mér. Ég tek því á þann hátt þegar fólk segir svona við mig,“ segir Valgerður einnig við DV.
Hvetur fólk til fræðslu
Valgerður segist aldrei hafa lent í svona dónaskap og að sumir mættu temja sér meiri kurteisi í samskiptum við afgreiðslufólk.
Hún segist einnig vilja sjá Íslendinga fræða sig meira og bendir á að Ísland sé ekki lengur fámenn þjóð, á Íslandi búi fólk frá öllum heimshornum nánast. Það sé því mikilvægt að sýna hvoru öðru virðingu og kurteisi, og spyrja og fræðast. Hagstofan greinir einmitt frá því að innflytjendur á Íslandi hafi aldrei verið fleiri.
„Ef þú spyrð annað fólk færðu tækifæri á að læra svo mikið, um þjóð þeirra, menningu og hvernig eigi að sýna þeim umburðarlyndi. Þér hlýtur að líða mjög illa að þurfa að nota þetta orð. Ég vorkenndi strax þessum manni, að hafa svona hatur inni í sér en ég er ekki pirruð út í hann. Honum hlýtur að líða illa. Eitt það mikilvægasta sem við þurfum að gera á Íslandi er fræðsla og að spyrja fólk,“ segir Valgerður að lokum.
