Kolbeinn Óttarsson Proppé, þingmaður Vinstri grænna, segir kröfur sjö útgerðarfélaga sem vilja bætur úr ríkissjóði vera „fáránlega græðgi og óbilgirni“.
Hann tjáði sig um kröfurnar á Facebook í dag um kröfurnar en upplýsingar um þær komu fram í gær í svari Kristjáns Þórs Júlíussonar, sjávarútvegs- og landbúnaðarráðherra, við fyrirspurn Þorgerðar Katrínar Gunnarsdóttur, formanns Viðreisnar.
Útgerðirnar krefjast samanlagt 10,2 milljarða króna og vísa í skaðabótaskyldu ríkisins eftir dóm Hæstaréttar um lögmæti úthlutunarinnar árið 2018. Þær halda því fram að úthlutanir veiðiheimilda á makríl hafi verið ólögmætar.
Ríkislögmaður hafði neitað að afhenda fjölmiðlum stefnur útgerðanna en úrskurðarnefnd um upplýsingamál úrskurðaði nýlega að Kjarninn og Viðskiptablaðið fengju þær.
„Þessar kröfur eru forkastanlegar og til dæmis um fáránlega græðgi og óbilgirni. Ágætt er að hafa í huga að dómurinn, sem kröfurnar byggja á, fjallaði ekki um að umrædd úthlutun hefði verið ósanngjörn, aðeins að hún hefði átt heima í lögum en ekki reglugerð,“ segir Kolbeinn.
„Álögur á útgerðir hafa löngum verið deilumál og að mínu mati hefur aðeins í tvígang tekist að koma þeim í eitthvert lag; annars vegar 2009-13 þegar sértæka auðlindagjaldið var sett á og svo núna, þar sem búið er að koma upp kerfi þar sem þriðjungur verðmætasköpunar fer í ríkissjóð og gjaldið hækkar í góðu árferði. Þar er sérstaklega hugað að uppsjávarveiði og nóg kvörtuðu þær útgerðir yfir því álagi. Holur hljómur er í þeim umkvörtunum nú og það hlýtur að þurfa að setjast sérstaklega yfir uppsjávarálagið, skoða hvort það sé nógu hátt.“
„Þessar útgerðir verða dæmdar af verkum sínum, ef þær ætla að halda því til streitu að sælast eftir 10-15 milljörðum úr ríkissjóði (þegar vextir eru taldir með) í eigin vasa, í þeirri stöðu sem við nú erum í þar sem við þurfum hverja krónu til að komast saman í gegnum erfitt efnahagsástand“ segir hann að lokum.
