Lagt hefur verið hald á yfir 200 kíló af fíkniefnum það sem er af þessu ári. Lögreglan og tollyfirvöld segja að hlutfall kókaíns af því sem lagt er hald á sé meira en áður og efnin séu mun sterkari en áður hefur þekkst. Þá hefur innlend framleiðsla á efnum á borð við amfetamín aukist. Merkin um aukna kókaínneyslu á Íslandi er ekki bara að sjá í tölum frá löggæslustofnunum landsins, heldur einnig er orðið vart við á Landsspítalanum.
Í viðtali við Spegilinn á RÚV segir Jón Magnús Kristjánsson, yfirlæknir bráðalækninga á Landspítalanum, segir neyslumynstrið hafa breyst þegar kemur að fíkniefnum. „Við sjáum minna af því núna en við sjáum hins meira af fólki sem er að koma inn af neyslu kókaíns einmitt. Það eru ákveðin einkenni sem eru af öllum örvandi lyfjum, bæði amfetamíni og kókaíni. Þetta er fjölbreyttur hópur. Sumir eru að prófa þetta í fyrsta sinn og líkar ekki. Er hrætt við áhrifin. Aðrir hafa notað þetta reglulega sér til skemmtunar,“ segir Jón Magnús.
