Hlutabréfamarkaðir í Lundúnum, París og Frankfurt hafa hríðfallið frá því að þeir voru opnaðir í morgun. Verðhrunið á kínverskum hlutabréfamörkuðum hefur smitast yfir til Evrópu og óttast fjárfestar að áhrifanna muni jafnframt gæta í Bandaríkjunum þegar markaðir opna þar eftir hádegi.
Að því er fram kemur í viðskiptafréttum Morgunblaðsins í dag hefur FTSE 100 hlutabréfavísitalan í Lundúnum lækkað um 2,6% í morgun, en markaðir í Frakklandi og Þýskalandi féllu um næstum 3%.
Algjört verðhrun varð á kínverskum hlutabréfamarkaði í nótt. Shanghai Composite hlutabréfavísitalan hríðféll til að mynda um 8,5% og hefur ekki lækkað jafn mikið á einum degi í átta ár.
Í blaðinu segir að kínversk stjórnvöld hafi reynt að hughreysta óttaslegna fjárfesta, án árangurs. Þau hafi leyft stærstu lífeyrissjóðum landsins að fjárfesta á hlutabréfamarkaðinum.
David Madden, markaðsgreinandi hjá IG, segir að hlutabréfamarkaðir séu um þessar mundir á mikilli niðurleið: \"Ég held að meiri óvissa sé framundan,“ segir hann. Fjárfestar geti þurft að bíða í fáeinar vikur eftir því að markaðurinn taki aftur við sér.
Shanghai vísitalan lækkaði um 12% í seinustu viku og hefur nú fallið um 30% frá því um miðjan júnímánuð.
Áhrifanna gætti víðar, en Dow Jones hlutabréfavísitalan í Bandaríkjunum lækkaði um 6% í liðinni viku og breska vísitalan FTSE 100 um 5%. Hefur sú síðarnefnda ekki lækkað eins mikið á einni viku í átta mánuði.
Fyrr í mánuðinum felldi Seðlabanki Kína gengi kínverska gjaldmiðilsins, júansins, í viðleitni sinni við að auka útflutning frá landinu.
Fjárfestar í Evrópu óttast að ódýrara júan þýði að evrópskar útflutningsgreinar verði minna samkeppnishæfar, samkvæmt því sem segir í samantekt Morgunblaðsins um málið í dag.
