Þar segir að þegar nýtt greiðsluþátttökukerfi hafi tekið gildi í fyrra hafi öll læknisþjónusta og þjálfun átt að falla undir það. Kerfið hefði átt að lækka kostnað þeirra sem þyrftu mikla þjónustu, en þeir sem þyrftu hana sjaldnar borguðu meira í hvert sinn. Sett hefði verið þak á greiðslur, tæpar 70 þúsund krónur á ári hjá almennum notendum en 46 þúsund fyrir börn, öryrkja og ellilífeyrisþega.
Fréttastofa fékk upplýsingar frá Sjúkratryggingum um áhrif kerfisins. Ef fyrstu sjö mánuðirnir frá því kerfið var innleitt, maí til nóvember, eru bornir saman við sama tímabil árið 2016, sést að heildarkostnaður sjúkratryggðra lækkaði um 276 milljónir, eða um 7%. Kostnaður almennra notenda lækkaði um 438 milljónir og gjöld vegna barna um tæpar 19 milljónir.
Hins vegar greiddu öryrkjar samtals um 42 milljónum meira eftir að kerfið tók gildi, sem er 16% aukning. Þá jókst kostnaður aldraðra um 139 milljónir, eða um fjórðung. Hlutdeild aldraðra í heildarkostnaði notenda heilbrigðisþjónustu jókst jafnframt úr 14% í 19%.
