„Ég myndi segja við séum stödd í merkilegu sögulegu uppgjöri,“ segir Katrín Jakobsdóttir forsætisráðherra um umræðuna um kynferðisofbeldi á Íslandi.
Forsætisráðherrann ræddi í Bítinu á Bylgjunni um aðgerðir stjórnvalda til að sporna við kynferðisofbeldi eftir #MeToo bylgjuna.
Hún segir að flóð frásagna þolenda í #MeToo bylgjunni hafi verið áfall fyrir alla. Stjórnvöld hafi brugðist strax við með því að fara í heilmiklar aðgerðir.
„Alveg frá því að fyrsta MeToo hreyfing fór af stað höfum við verið stödd í gríðarlegri deiglu þar sem þolendur hafa verið að stíga fram sem var eins og áfall fyrir okkur og aðrar þjóðir þar sem svipaðar hreyfingar stigu fram.“
Tekur hún fram að meðan þjóðin er stödd í þessu uppgjöri komi upp alls konar álitamál og flækjur. Staðan þolenda sé hægt og bítandi að breytast. Segir hún að örlög þolenda hafi verið að hverfa frá sínum vinnustað eða úr því umhverfi þar sem brotin voru framin. Nú sé verið að einblína á gerendur.
„Afleiðingarnar voru þolenda megin. Gerendur segja núna: Bíddu hér er heilmiklar afleiðingar fyrir ósönnuð brot. Við erum stödd í miðri þessari deiglu.“
Tekur Katrín fram að samfélagið verði að sætta sig við það að úrbætur muni taka tíma. Stjórnvöld hafi þegar ráðist í úrbætur á réttarkerfinu eins og varðandi stafrænt kynferðisofbeldi og umsáturseinelti. Einnig hafi forvarnaáætlun til fimm ára gegn kynferðisofbeldi verið samþykkt.
Aðspurð hvort nóg hafi verið gert segir forsætisráðherra að enn séu ókláruð mál inni á þingi til að bæta réttarstöðu brotaþola. Hún vilji ráðast í það sem fyrst en einnig þurfi að ræða rót vandans.
„Af hverju búum við í samfélagi þar sem við erum með gerendur og þolendur? Af hverju erum við að sjá oftar drengi að beita stúlkur ofbeldi? Hverjar eru ástæðurnar og hvernig getum við rætt þetta án þess að drengirnir hrökkvi í vörn?“
