Katrín Jakobsdóttir, forsætisráðherra, segir eiginmann sinn, Gunnar Sigvaldason, hafa spillt sonum þeirra þremur. Katrín var gestur Valtýs Björns í hlaðvarpinu Mín skoðun.
Katrín er mikill aðdáandi Liverpool í ensku úrvalsdeildinni, hefur hún meðal annars mætt með trefil liðsins á Alþingi. Gunnar er hins vegar aðdáandi Manchester United.
„Ég hef náttúrulega ekki sinnt uppeldi barnanna nægilega vel þannig að þeir eru Manchester United menn. Maðurinn minn er Manchester United maður. Hann hefur eytt meiri tíma með börnunum. Hann er búinn að eyðileggja þetta,“ sagði Katrín.
Hún er hrifin af þjálfara liðsins, Jurgen Klopp. Segir hún að uppáhaldsleikmenn sínir séu Sadio Mane og Mo Salah.
