Katrín Jakobsdóttir, forsætisráðherra, segir að hún dáist að samstöðu sem hún hefur skynjað í samfélaginu vegna COVID-19. Að sama skapi hafi hún fyllst reiði þegar sjö sjávarútvegsfyrirtæki hafi lagt fram kröfu á hendur ríkinu um 10,2 milljarða króna bætur vegna makrílkvóta. Kjarninn greinir frá.
Katrín lét ummælin falla á Alþingi í dag þegar hún flutti munnlega skýrslu um áhrif COVID-19 faraldursins á samfélagið og viðbrögð stjórnvalda við honum.
Sjö útgerðir krefja íslenska ríkið um 10,2 milljarða króna auk hæstu fáanlegu vaxta vegna þess tjóns sem þau telja sig hafa orðið vegna makrílkvóta sem ekki fór til þeirra árin 2011 til 2018. Útgerðirnar ákváðu að höfða mál eftir tvo dóma sem féllu í Hæstarétti í desember 2018 þar sem sagði að ekki hefði verið haldið rétt á úthlutun á makrílkvóta.
„Ég vil segja það að hér að ég hef verið gríðarlega ánægð með þá samstöðu sem maður hefur skynjað í samfélaginu í því að takast á við veiruna. Bæði fyrirtæki og fólk hafa þar sýnt mikla ábyrgð. Flokkar á Alþingi hafa sýnt mikla ábyrgð. Þetta er dýrmætt.
En þá verður maður líka reiður þegar fyrirtæki í sjávarútvegi gera kröfu á ríkið upp á ríflega tíu milljarða vegna makrílúthlutunar.“
Katrín segir þetta ekki leiðina til að efla samstöðu hérlendis. „Það er ekki góð leið til að vera á sama báti í gegnum þetta ferðalag sem við erum stödd í. Þó ég telji að ríkið hafi góðan málstað í þessu máli þá finnst mér eðlilegt að þessi fyrirtæki íhugi það að draga þessar kröfur á til baka. Nú reynir nefnilega á ábyrgð okkar allra.“
Um er að ræða fyrirtækin Gjögur hf., Ísfélag Vestmannaeyja hf., Skinney-Þinganes hf., Loðnuvinnslan hf. og Huginn ehf., Eskja hf. og Vinnslustöðin hf.
Stærsta krafan er frá Ísfélagi Vestmannaeyja. Félagið krefst tæplega 3,9 milljarða króna auk vaxta úr ríkissjóði. Stærsti eigandi félagsins er Guðbjörg Matthíasdóttir, en félög í eigu Guðbjargar og fjölskyldu hennar eru einnig stærstu eigendur Árvakurs, útgáfufélags Morgunblaðsins.
