Breyta þarf lögum til að laga stöðu kvenna í atvinnulífinu, segir formaður Vinstri grænna.
Af þeim sem stýra peningum á Íslandi eru 91 prósent karlar en níu prósent konur. Katrín Jakobsdóttir, formaður VG segir að það þurfi róttækar aðgerðir til að breyta stöðunni. Fjallað er um málið í nýjasta sjónvarpsþætti Kjarnans, sem er á dagskrá í kvöld.
Katrín segir að það sé með öllu óviðunandi hversu lengi það taki að laga ójöfn hlutföll milli kynja í íslensku atvinnulífi. Hún segir það hafa sýnt sig að það þurfi róttækar aðgerðir, til dæmis með breytingu á lögum, til að koma breytingum í gegn. Dæmi um slík eru lög um lágmarkshlutfall kynja í stjórnum stærri fyrirtækja og jafnlaunavottun. Katrín segir að það þurfi mögulega að skoða hvort það þurfi að breyta lögum um lífeyrissjóði í ljósi þess að nær allir helstu stjórnendur þeirra,sem sýsla með gríðarlegt fjármagn og völd, séu karlar. Hún segir þetta um jafnlaunafrumvarpið:
Þetta kemur fram í sjónvarpsþættinum Kjarnanum sem frumsýndur er á Hringbraut í kvöld klukkan 21:30. Viðfangsefni þáttarins er ójöfn staða kynjanna í íslensku viðskiptalífi. Katrín er viðmælandi í síðari hluta þáttarins.
Kjarninn hefur síðastliðin fjögur ár gert úttekt á stöðu kvenna á meðal æðstu stjórnenda viðskiptabanka, sparisjóða, lífeyrissjóða, skráðra félaga, félaga á leið á markað, óskráðra tryggingafélaga, lánafyrirtækja, verðbréfafyrirtækja og –miðlana, framtakssjóða, orkufyrirtækja, greiðslustofnana, Kauphallar og lánasjóða. Úttektin nær til æðsta stjórnanda hvers fyrirtækis eða sjóðs. Niðurstaðan í ár, samkvæmt úttekt sem framkvæmd var í febrúar 2017, er sú að æðstu stjórnendur í ofangreindum fyrirtækjum séu 88 talsins. Af þeim eru 80 karlar en átta konur. Það þýðir að 91 prósent þeirra sem stýra peningum á Íslandi eru karlar en níu prósent konur.
Umsjónarmenn Kjarnans á Hringbraut eru Þórður Snær Júlíusson og Þórunn Elísabet Bogadóttir.
