Karlar bera fremur nöfn feðra sinna

Tvöfalt meiri líkur eru á að karlar (11%) beri sama eiginnafn og feður þeirra en að konur (5%) séu nefndar eftir mæðrum sínum. Karlar eru hins vegar einungis 5% líklegri til þess að vera nefndir eftir afa sínum en konur til að bera nafn ömmu sinnar, að því eer fram kemur á vef Hagstofunnar.

Konur á aldrinum 18–30 ára (2%) eru tvisvar sinnum líklegri til að nota nafn móður sinnar sem kenninafn en konur á aldrinum 31–50 ára (1%). Líkurnar á því að karlar 20 ára og yngri beri móðurnafn sem kenninafn eru 1,2% en einungis 0,6% hjá körlum á aldrinum 35–50 ára.

Mun meiri líkur eru á að fólk noti ættarnafn föður (um 70%) en móður (15%). Líkurnar á að bera ættarnafn eru 3,8% hjá einstaklingum 50 ára og eldri en 3,2% hjá þeim sem yngri eru.

Þrisvar sinnum fleiri heita Blöndal en Berndsen eða Norðdahl og tvisvar sinnum fleiri heita Blöndal, Thorarensen eða Hansen en Briem, Thorlacius eða Jensen.

Flestir karlar á Íslandi heita Jón, Guðmundur eða Sigurður en algengustu nöfn kvenna eru Guðrún, Anna eða Kristín, óháð fæðingarstað. Líklegast er að stúlkur sem fæddust árið 2016 heiti Emilía eða Íris ef þær eru fæddar á Austurlandi; Birta, Karítas eða Sunna á Norðurlandi eystra; Emma á Norðurlandi vestra, Auður á Vestfjörðum, Hanna á Suðurnesjum, Sara á höfuðborgarsvæðinu og Kristín eða Rakel ef þær eru fæddar á Suðurlandi. Líklegast er að drengir sem fæddust árið 2016 heiti Alexander ef þeir hafa fæðst á höfuðborgarsvæðinu, Austurlandi eða á Suðurnesjum, Aron á Vesturlandi eða Norðurlandi eystra, Arnar á Suðurlandi, Baltasar og Arnór á Norðurlandi vestra en Haukur, Sigurður eða Tristan hafi þeir fæðst á Vestfjörðum.