Kári Stefánsson, forstjóri Íslenskrar erfðagreiningar, þvertekur fyrir ásakanir um að hann hafi kallað feitt fólk heimskt. Kári hélt erindi á fræðslufundi Íslenskrar erfðagreiningar í gær um offitumál Íslendinga ásamt Ragnari Bjarnasyni yfirlækni á LSH, Tryggva Helgasyni barnalækni, Þorgeiri Þorgeirssyni erfðafræðingi og Ölmu D. Möller landlækni.
Á fundinum sagði hann að tengsl væru á milli offitu og greindar en hann segir að nú sé ljóst á viðbrögðum sumra að mál hans hafi verið misskilið.
„Ég sagði ekki að feitt fólk væri heimskt enda hefði það bæði verið rangt og ósmekklegt. Ég vil benda á máli mínu til áréttingar að á fræðslufundinum talaði til dæmis fóstbróðir minn Þorgeir Þorgeirsson sem er bæði mun gildari en ég og miklu gáfaðri,“ segir Kári í færslu á Facebook.
Hann segist einnig vilja árétta eftirfarandi:
„2. Ég sagði hins vegar að það væru þau tengsl milli offitu og greindar að því meiri arfgenga tilhneigingu (polygenic risk score) sem menn hefðu til þess að fitna þeim mun ver gengi mönnum á gáfnaprófum (tests of cognitive function). Þetta er staðreynd en ekki skoðun. Hér er eingöngu verið að tala um meðaltal. Sumir þeirra sem eru með mikla arfgenga tilhneigingu til þess að fitna eru bæði grannir og mjög gáfaðir, aðrir feitir og mjög gáfaðir og þeir þriðju grannir og vitlausir.
3. Þorgeir Þorgeirsson benti á það á fræðslufundinum að því meiri arfgenga tilhneigingu sem menn hefðu til þess að fitna þeim mun meiri líkur væru á því að þeir ánetjuðust tóbaki. Það væri því að mörgu leyti skynsamlegt að líta á offitu sem fíknisjúkdóm. Ég tók undir það.
4. Ég lagði áherslu á að það mætti skilja sambandið milli arfgengrar tilhneigingar til þess að fitna og skýrleika í hugsun þannig að ef heilinn sem stjórntæki starfi eins og við viljum þá borðum við í hófi og hugsum skýrt. Það er ljóst á þeim niðurstöðum sem ég vitnaði í að það eru breytanleikar í erfðamengi okkar sem hafa áhrif bæði á skýrleika í hugsun og át, láta okkur borða meira og vega að skýrleika í hugsun.
5. Ég lagði áherslu á að offita vegi ekki að starfsemi heilans eða að skýrleika í hugsun en starfsemi heilans hafi áhrifa á það hvort við fitnum eða ekki og starfsemi heilans eins og starfsemi annara líffæra markist að miklu leyti af erfðum.\"
Hann segist að lokum ekki hafa verið að tjá sínar persónulegu skoðanir á málinu. „Ég var ekki að tjá skoðanir á feitum eða grönnum, gáfuðum eða vitlausum, ég var einfaldlega að tala um niðurstöður rannsókna. Ég var að tala um staðreyndir. Að vanda fara staðreyndir misjafnlega vel í fólk.“
