Einar Sveinbjörnsson veðurfræðingur segir ýmislegt benda til þess að kuldafrávik í Atlantshafi muni hafa áhrif á veðurfar á norðurhveli nú í sumar og þar af leiðandi á Íslandi. Í viðtali við mbl.is segir hann sjóinn sunnan Íslands vera talsvert kaldari en áður og að ýmislegt bendi til þess að ekki sé um skammtímasveiflur að ræða. Það sé alþekkt frá fyrri tíð að svona frávik frá hitastigi sjávar hafa áhrif á tíðarfarið, og leiði til kaldara sumars.
Einar segir sjávarhitann stjórna veðurfarinu hjá okkur. Ef breytingar verða á hita sjávarsvæðanna við Ísland hafi það áhrif á þrýstifarið og varmaskipti á milli lofthjúps og sjávar og þetta tvennt sé það sem móti veðrið hjá okkur frá degi til dags, sérstaklega á eyju úti í Atlantshafi sem umlukin er sjó.
