Áframhaldandi skjálftavirkni hefur mælst í nágrenni við Grindavík. Fyrr í kvöld mældist jarðskjálfti að stærðinni 4.3. Samkvæmt fyrstu mælingum sagði að skjálftinn hefði verið 3.9 að stærð en því var breytt um klukkan 22:40. Þá reið annar skjálfti að stærðinni 4 yfir svæðið. Þá mældust tveir skjálftar um 3.4 og þá var einn skjálftinn rétt undir þremur. Á samskiptamiðlum tjá margir íbúar í Grindavík sig um skjálftana og ljóst að þeir hafa fundist vel í bænum. Þannig segir einn íbúi á svæðinu:
„Omg hér kom svakalegur jarðskjálfti.“
Í athugasemd jarðvísindamanns á Veðurstofu Íslands segir:
„Nýjasta GPS úrvinnslan sýnir áframhaldandi landris á svæðinu vestan við Þorbjörn. Í heildina hefur land risið yfir 4 cm frá 20. janúar sl.
Búast má við áframhaldandi skjálftavirkni á svæðinu og að áfram finnist stærstu skjálftarnir í hrinunni í grennd við Grindavík.
Líklegasta skýring þessarar virkni er kvikuinnskot á 3-9 km dýpi rétt vestan við Þorbjörn. Líklegast er að virknin ljúki án eldsumbrota.“
