Innheimt gjald í ofanflóðasjóð á tímabilinu 1998-2019 á verðlagi í desember 2019 nemur alls um 43,4 milljörðum. Var gjaldið fyrst lagt á árið 1998. Aðeins hluti upphæðarinnar hefur verið nýtt í varnir. Fréttablaðið greindi nýverið frá að enn væri framkvæmdum við varnarmannvirki ólokið á átta þéttbýlisstöðum á landinu. Til að koma vörnum við á þessum svæðum þarf að verja öðrum 21 milljarði króna í framkvæmdir. Jón Þórisson, ritstjóri Fréttablaðsins, gagnrýnir harðlega í leiðara blaðsins hvernig sjóðnum hafi verið stýrt. Jón segir:
„Ofanflóðasjóður var stofnaður 1997 til að mæta uppbyggingunni á vörnunum. Sjóðurinn er í vörslu umhverfisráðuneytisins en tekjur hans eru árlegt gjald sem lagt er á allar brunatryggðar húseignir sem nemur 0,3 prósentum af vátryggingarverðmæti. Fram kom í umfjöllun blaðsins að áætlað væri að rúmlega 20 milljarðar séu í sjóðnum sem ættu að duga til að ljúka verkefnunum en í fjárlögum hvers árs er fé ráðstafað til varnanna.“
Jón er ekki sá eini sem hefur gagnrýnt sjóðinn, það hefur Halldór Halldórsson, fyrrverandi borgarfulltrúi Sjálfstæðisflokksins og Aldís Hafsteinsdóttir bæjarstjóri í Hveragerði en hún er einnig formaður Sambands íslenskra sveitarfélaga. Jón vitnar í orð Halldórs sem tjáði sig í síðastliðinni viku við Fréttablaðið en Halldór er nefndarmaður í ofanflóðanefnd.
„Við hlaupum upp til handa og fóta þegar hamfarirnar skella á en fyrirbyggjandi aðgerðir ganga hægt. Það blasir við að snjóflóðavarnir skiptu sköpum í þessum hamförum í fyrrinótt. Við sem þjóð munum aldrei fyrirgefa okkur það ef líf tapast vegna hamfara á skilgreindum hættusvæðum.“
Jón segir: „Hann [Halldór] segist hafa bent ítrekað á þetta um árabil. Nefndarmaðurinn hlýtur að velta fyrir sér stöðu sinni í nefndinni ef ekki er hlustað á hann árum saman. En það leysir engan vanda.“
Jón bendir á að vandinn sé að peningurinn hafi verið nýttur í rekstur ríkissjóðs. Þá gagnrýnir hann að aðeins þriðjungur þess sem innheimt skuli vera varið í varnir.
„Það er til skilgreining á þeirri aðstöðu að innheimta fé í eitt og verja því í annað,“ segir Jón og bætir við:
„Það teljast svik. Ekki bara við þá sem á þessum stöðum búa, né bara við þá sem inna gjaldið af hendi. Það teljast svik við alla landsmenn.“
