Jón Steindór Valdimarsson, þingmaður Viðreisnar, segir frumvarp um þungunarrof snúast um yfirráða- og sjálfsákvörðunarrétt kvenna yfir eigin líkama. Fréttablaðið greinir frá.
„Það er grundvallaratriði í málinu og sá sjónarhóll sem við eigum að horfa á málið út frá,“ sagði Jón Steindór í umræðum um störf þingsins í morgun. „Í mínum huga snýst málið ekki um vikutalningu. Það snýst um að konur ráði sér sjálfar, hver og ein á eigin forsendum, og það geti aldrei verið þannig að opinberir aðilar eða fagaðilar eigi að segja konum hvað þeim er fyrir bestu og hvaða ákvarðanir þær eigi að taka.“
Meirihluti velferðarnefndar hefur lagt til að frumvarpið, sem kveður á um að konur geti rofið þungun allt til loka 22. viku meðgöngu, verði samþykkt.
Jón Steindór telur mikilvægt að konum sé veitt ráðgjöf og þeim gefnar upplýsingar ef eftir því er leitað en ítrekar að ákvörðunin sé á endanum konunnar sjálfrar. Þá sagði hann aukið frelsi í þessum málum ekki til þess fallið að fjölga þungunarrofum. „Þvert á móti bendir margt til þess að þungunarrofum fækki.“
Einnig hvatti Jón Steindór þingmenn til að gæta hófs í orðavali sínu í umræðu um frumvarpið, en hart var tekist á um það í umræðum í gær. „Málið verðskuldar vandaða umfjöllun og hófstillta umræðu og ég hvet háttvirta þingmenn sem taka þátt í umræðunni til að gæta hófs í orðavali sínu um þau mál.“
