„Þegar WOW air fór endanlega á hausinn sagði Bjarni Ben, fjármálaráðherra, að ekki hefði komið til greina að bjarga flugfélaginu með opinberu fé. Áhættan væri of mikil. Sagði hann ráðherranefnd sem fylgdist með örlögum félagsins vera sammála um þetta atriði.“
Þannig hefst grein Jóhanns Þorvarðarsonar á Miðjunni, þar sem hann veltir því fyrir sér hvort ríkisstjórnin hafi gefið grænt ljós á lögbrot Isavia.
Þar vísar hann til þess að Isavia, fyrirtæki í eigu ríkisins, hafi lánað WOW air rúmlega tvo milljarða áður en flugfélagið fór í þrot. „Nýlega upplýstist endanlega að Isavia hefði veitt WOW air lán upp á rúmlega 2 milljarða í formi greiðslufrests á lendingargjöldum. Lán sem er ígildi ólöglegs ríkisstyrks til fyrirtækis í samkeppnisrekstri. Ef héraðsdómur stendur þá er öll þessi fjárhæð nánast töpuð þar sem þrotabú félagsins ræður ekki við skuldina.“
„Hvað ætli fjármálaráðherra og formaður Sjálfstæðisflokksins hafi haft um þetta að segja. Jú, hann bað menn að skoða heildarmyndina. Á meðan WOW air var enn að fljúga þá skapaði það aðrar tekjur á móti töpuðum lendingargjöldum fyrir Keflavíkurflugvöll. Þannig að tapið varð minna en ella. Jahá, þetta er stórundarleg réttlæting!“ bætir Jóhann við.
Hann segir ofangreind tvenn rök gagnkvæmt útilokandi. „Hér verður ráðherrann að velja hvoru megin hann ætlar að standa. Fyrri rökin eru skynsamleg og í samræmi við samkeppnislög sem gilda á Evrópska efnahagssvæðinu. Seinni rökin halda ekki vatni og styðja við ólögmæti.“
Jóhann bendir á að þrátt fyrir að áframhaldandi flug WOW air hafi skapað óræðar hliðartekjur fyrir flugvöllinn hafi ógreidd lendingargjöld vaxið hraðar. Það hafi komið fram í máli Sveinbjörns Indriðasonar, starfandi forstjóra Isavia, í fjölmiðlum nýverið.
„Önnur flugfélög nutu ekki sambærilegs fjárstuðnings frá ríkisfyrirtækinu Isavia. Með ákvörðunum sínum skekkti Isavia samkeppnistöðu annarra flugfélaga og olli hugsanlega tapi hjá þeim. Það er alvarlegt og ekki útilokað að flugfélögin sæki sér bætur til Isavia,“ segir hann einnig.
Jóhann segir það óskiljanlegt að Bjarni hafi ákveðið að verja ákvarðanir Isavia, þar sem engir þjóðarhagsmunir hafi verið undir með falli WOW air.
Hann veltir því fyrir sér hvort ríkisstjórnin hafi því gefið grænt ljós á lögbrot Isavia og segir Bjarna verða að upplýsa málið. Að lokum segir Jóhann tveimur grundvallarspurningum ósvarað:
„1. Hverjir ætla að axla ábyrgð á málinu[?] Eða á að beita íslensku hefðinni – engin[n] axlar ábyrgð?
2. Hvað ætlaði Isavia, Samgöngustofa og ríkisstjórnin að láta málið ganga lengi án inngripa og hvað mátti málið kosta ríkissjóð? Tveir milljarðar stoppuðu ekki málið, hvað með 3 eða 4 eða 10 milljarða?“
