Vilhjálmur Bjarnason, þingmaður Sjálfstæðisflokks, segir íslenskan landbúnað í hnignun og allt of mikið sé gert úr gæðum hans. Hann vill sjá útgjöld til rannsókna og þróunar í samhengi við þau útgjöld sem fara í landbúnað.
Þetta kom fram í máli Vilhjálms í útvarpsþættinum Sprengisandi í gærmorgun. Hann sagðist standa við fyrri ummæli sín þess efnis að landbúnaður teljist varla til atvinnuvega þar sem langstærstur hluti tekna hans kemur úr beingreiðslum. Hann lýsti áhyggjum sínum af því hvernig íslenskur landbúnaður er að þróast. Í þeim efnum sé nóg að keyra um byggðir landsins og lesa hagtölur og afkomutölur: \"Þetta er ekki glæsilegt,“ sagði þingmaðurinn og benti á misjafnt ástand bæja og fækkun búa. Þá séu flestir sauðfjárbændur til að mynda í annarri vinnu samhliða búskap, skólaakstri og öðru snatti á meðan húsfreyjur sinna kennslu og öðru.
\"Þetta er hnignun og menn geta deilt á mig fyrir að ræða þetta,\" sagði Vilhjálmur í þættinum og taldi í sjálfu sér ekkert að því að búum fækki, en fráleitt væri að tala um landbúnað sem einhvern vaxtarbrodd í íslensku atvinnulífi: \"Svo hlustar maður á mærðar ræður eins og fyrrverandi landbúnaðarráðherra þar sem verið að tala um gæði íslenska smjörsins. Þegar hinsvegar vantaði smjör, þá var allt í lagi að troða í þjóðina íslensku smjöri án þess að segja frá því. Svo þegar átti að fara að selja írskt smjör þá var það orðið eitur. Mér skilst að það hafi átt að farga því sem eftir var. Ég skil ekki svona lýðskrum.\"
Hann kveðst undrast allt tal um að íslenskur landbúnaður sé á heimsmælikvarða og þeir sem fara á mis við hann lifi ekki jafn góðu lífi og Íslendingar: \"Af hverju eru ekki allir í útlöndum dauðir sem ekki fá íslenskar landbúnaðarafurðir,\" spyr þingmaðurinn og sagðist ekki vilja gera lítið úr matvælaöryggi, en hann hefði hins vegar aldrei séð þá skilgreiningu. Hér sé þetta meira og minna „klætt í rómantík“ og felst fyrst og fremst í viðskiptahindrunum sem skapi ekki bætt lífskjör
Aðspurður hvað eigi að gera í þessum efnum benti þingmaðurinn á að Íslendingar hafi verið afkastamiklir í hátæknigreinum. Hér hafi risið fyrirtæki sem séu að gera býsna góða hluti þegjandi og hljóðalaust: \"Og þróunin myndi ganga mun hraðar ef að framlög til rannsóknar og þróunar væri í einhverju samhengi við framlög til landbúnaðarins. Við verðum að búa þannig um hnútana að ungt fólk sem er að byrja í skóla núna hafi að einhverju að hverfa þegar það kemur heim, að það geti kosið að koma heim og unnið við atvinnu, framleiðslu og þjónustu sem gefur þokkaleg laun.\"
