Hlutabréfaverð alþjóðlegra álfyrirtækja með starfsemi á Íslandi hefur hríðlækkað á síðastliðnum tólf mánuðum. Bréfin hafa verið að lækka á bilinu 34% til 73% á þessum tíma.
Morgunblaðið birtir samantekt þessa efnis þar sem segir að gengi hlutabréfa í Century Aluminum, sem rekur meðal annars Norðurál á Grundartanga, hafi lækkað um 73%, gengi Alcoa, sem á meðal annars álver á Reyðarfirði, hafi farið niður um 42% og þá hafi gengi bréfa í Rio Tinto Alcan, sem rekur álverið í Straumsvík, fallið um 34%.
Á sama tíma hefur álverð lækkað um 24%.
Í frétt blaðsins er sá fyrirvari hafður á að miklar sveiflur hafi verið á hlutabréfaverði fyrirtækjanna þriggja á undanförnum árum. Þannig var hlutabréfaverð í Century í 31 dal á hlut þegar það var sem hæst í nóvember í fyrra en lægst hefur það verið 5,6 dalir á hlut í júlímánuði árið 2012, þegar litið er til seinustu fimm ára. Nú stendur það í um 5,8 dölum á hlut.
Þá hélst hlutabréfaverð í Alcoa tiltölulega lágt, á bilinu sjö til tíu dalir á hlut, frá seinni hluta árs 2011 til loka árs 2013. Hæst náði það í tæplega átján dölum á hlut snemma árs 2011 og var það jafnframt á svipuðum slóðum í nóvember í fyrra. Nú er það um 9,4 dalir á hlut.
Mestu sveiflurnar hafa verið á hlutabréfaverði Rio Tinto Alcan. Þegar litið er til seinustu fimm ára sést að það náði hvað hæst í 73 dölum á hlut í júlí 2011 en lægst var það í 39 dölum á hlut tveimur árum síðar. Fyrir tólf mánuðum var það í 57,6 dölum en hefur síðan þá hríðfallið um 34%, niður í 38,2 dali.
