Ásgeir Jónsson hagfræðingur segir þjóðríki aldrei geta orðið gjaldþrota, því ólíkt fyrirtækjum og einstaklingum héldu ríki áfram að vera til og því ekki hægt að afskrifa þau. Þetta kom fram í nýjasta Heimsljósi þar sem efnahagsvandi Grikkja var krufinn inn að beini.
Ásgeir sagði einnig ljóst að Grikkir gætu ekki farið íslensku leiðina, því þeirra vandi væri stórfelldar skuldir ríkissjóðs en ekki bankanna líkt og hefði verið hér á landi þegar efnahagshrunið varð. Þá hefði ríkissjóður Íslands verið nánast skuldlaus en sett neyðarlögin til að setja bankana í þrot. Íslenska leiðin svokallaða fæli í sér fjármagnshöft og gengisfellingu. Það hefðu Íslendingar getað gert vegna krónunnar. Aðstaða Grikklands væri allt öðru vísi fyrir tilstilli evrunnar og ESB, og Grikkir gætu einungis nýtt sér leiðir eins og fjármagnshöft og önnur úrræði Íslendinga með því að ganga úr evrusamstarfinu og taka upp fyrri gjaldmiðil
Valgerður Bjarnadóttir alþingismaður sagði almenning á Grikklandi ekki gera sér grein fyrir þeim harmleik sem yrði ef drakman yrði endurvakin, og að kjör þeirra myndu versna um helming vegna hafta, gengisfellinga og verðbólgu.
Valgerður og Ásgeir voru gestir Sólveig Ólafsdóttur í Heimsljósi ásamt Eiríki Bergmann stjórnmálafræðingi og ræddu þar efnahagsvanda Grikklands og samningana við Alþjóðagjaldeyrissjóðinn. Þáttinn má sjá í heild sinni á hringbraut.is og klippur úr honum á sama stað.
