Íslendingar verja hlutfallslega mun minni fjárhæðum til velferðarmála en aðrar þjóðir Norðurlandanna að því er fram kemur í ítarlegri fréttaskýringu sem birt er í Fréttatímanum sem kom út í gær. Þetta á við um þjónustu við börn, fjölsluyldur og aldraða.
Í umfjöllun blaðsins segir að þegar borið er saman það hlutfall landsframleiðslunnar sem varið er til félagsmála á Norðurlöndunum sjáist að Ísland stendur hinum löndunum langt að baki. Miðað við meðaltal Noregs, Danmerkur og Svíþjóðar, sem er samanburðurinn sem Kári Stefánsson notar í kröfum sínum um hærra framlög til heilbrigðismála, þurfi að auka framlög til félagsmála úr 25,2% af landsframleiðslu í 30%, eða um rétt tæplega 100 milljarða króna, miðað við landsframleiðslu síðasta árs.
\"Þessir 100 milljarðar króna jafngilda rúmlega 290 þúsund krónum á hvert mannsbarn á Íslandi eða tæplega 1,2 milljónum króna á fjögurra manna fjölskyldu. En það er sama hvernig þessi upphæð er brotin niður. Hún sýnir hversu miklum mun meira börn, fjölskyldur, eldri borgarar, öryrkjar og aðrir fá frá velferðarkerfinu á Norðurlöndunum en sömu hópar fá í sinn hlut á Íslandi.
Þetta er meðal þess sem lesa má úr nýrri samanburðarskýrslu norrænu hagtölunefndarinnar um félagsleg málefni, Nososko, sem nýlega kom út. Skýrslan dregur fram hversu ólíkt íslenska velferðarkerfið er því kerfi sem náð hefur rótfestu á hinum Norðurlöndunum. Í mörgum tilfellum er munurinn svo mikill að segja má að íslenska kerfið sé allt annað og veikara.
Það er bara á einu sviði sem Íslendingar gera betur en hinar Norðurlandaþjóðirnar. Það er í húsnæðismálum. Ísland er eina landið sem styrkir húseigendur úr ríkissjóði og því eru það hlutfallslega miklu fleiri sem fá húsnæðisbætur á Íslandi en annars staðar á Norðurlöndunum. Þar tíðkast ekki að veita öðrum en leigjendum húsnæðisbætur. Þar eru vaxtagreiðslur frádráttabærar frá skatti sem kostnaður,\" segir í fréttaskýringu Fréttatímans í dag sem hægt er að skoða betur hér á vef blaðsins.
