Þorsteinn Pálsson, fyrrverandi forsætisráðherra segir í nýjasta pistli sínum á hringbraut.is að afstöðu þurfi að taka til gjaldmiðilsmála á næsta kjörtímabili svo landsmenn búi ekki áfram við kollhnísa sem allir bíði tjón af.
Hann minnir á að eftir hrun hafi verið nauðsynlegt að skrúfa fyrir útstreymi gjaldeyris. Nú þurfi hins vegar að skrúfa yfir innstreymi gjaldmiðils. Seðlabankinn verði áfram handvirkur á þessari skrúfu á meðan krónunnar njóti við: \"Það sem gerst hefur er þetta: Erlendir fjárfestar hafa keypt ríkisskuldabréf í stórum stíl síðustu mánuði til þess að njóta hærri vaxta en bjóðast annars staðar. Íslenskt launafólk borgar brúsann.\"
Hann útskýrir með öðrum orðum að svokölluð losun fjármagnshafta hafi það í för með sér að hemja þurfi innflæði fjármagns svo erlendir fjárfestar ræni ekki Seðlabankann völdum: \"Framtíðin er því ekki viðskiptafrelsi með gjaldeyri sambærilegt við það sem samkeppnislöndin njóta. Það verður óhjákvæmilegur fylgifiskur krónunnar að Seðlabankinn þarf að handstýra annað hvort útstreymi eða innstreymi á gjaldeyri. Kollhnísar milli innstreymisloka og útstreymisloka á gjaldeyrismarkaðnum verða að reglubundnum æfingum í leikfimisal peningamálanna.\"
Hann segir að átökin um peningamálin á nýafstöðnum landsfundi Sjálfstæðisflokksins hafi einmitt snúsit um þetta atriði. Unga fólkið hafi flutt þar tillögu frá sjónarhóli almannahagsmuna um að taka upp nýja samkeppnishæfa og gjaldgenga mynt. Flokksforystan hafi hins vegar kosið að verja ímyndað fullveldi yfir hávaxtakrónu. Hún telji að nægjanlega margir njóti ávinnings af því.
Um það efast Þorsteinn og botnar pistil sinn þessum orðum: \"Öll stór mál þarfnast gaumgæfilegrar skoðunar. En á endanum þarf að taka afstöðu. Betur færi á því að næsta kjörtímabil yrði tími kerfisbreytinga en kollhnísa milli innstreymisloka og útstreymisloka með gjaldeyri.\"
