Mikilvægt skref í átt að bættum aðgangi íslenskra fjárfesta og viðskiptaaðila að bandaríska markaðnum var tekið með framlagningu frumvarps sem, ef samþykkt, mundi auðvelda íslenskum fyrirtækjum að senda stjórnendur og fjárfesta tímabundið til starfa í landinu. Framlagning frumvarpsins kemur í kjölfar fjölda funda utanríkisráðherra með lykilþingmönnum Bandaríkjaþings. Íslensk fyrirtæki með starfsstöðvar eða mikil viðskipti í Bandaríkjunum mæta ákveðinni hindrun vegna reglna um vegabréfsáritanir til Bandaríkjanna sem hefur torveldað fyrirtækjum að senda stjórnendur og fjárfesta tímabundið til starfa í landinu.
Þetta kemur fram á vef Stjórnarráðsins. Þar segir enn fremur:
Íslandsfrumvarpið svonefnda var lagt fram í fulltrúadeild bandaríska þingsins í desember síðastliðnum. Frumvarpið (nr. 5496) sem ber heitið Increasing Trade and Investment from Iceland Act felur í sér að íslenskir fjárfestar og viðskiptafólk sem stunda viðskipti í Bandaríkjunum geti sótt um E-1 og E-2 vegabréfsáritanir. Guðlaugur Þór
„Íslendingar standa verr að vígi í þessum málum en ríkisborgarar nágrannaríkja okkar og ég hef lagt ríka áherslu á að rétta þessa stöðu og greiða aðgang íslenskra fjárfesta og viðskiptamanna að bandaríska markaðnum. Verði frumvarpið að lögum hefur stórum áfanga verið náð í að efla tengsl okkar við Bandaríkin á sviði viðskipta.“
Síðastliðið ár hefur Guðlaugur Þór, í tíðum samskiptum sínum við fulltrúa bandarískra stjórnvalda og þingmenn beggja deilda bandaríska þingsins lagt ríka áherslu á að íslenskum ríkisborgurum verði bætt við lista þeirra ríkja sem aðgang hafa að áritunum fyrir fjárfesta og viðskiptaaðila. Framlagning frumvarpsins er árangur fjölda funda utanríkisráðherra, m.a. með lykilþingmönnum öldungadeildar og fulltrúadeildar þingsins dagana 18.-19. september 2019 í Washington, og eftirfylgni sendiráðs Íslands í Washington.
Þá segir einnig á vef Stjórnarráðsins að í raun sé hér um að ræða viðskiptamál fremur en áritunarmál. Einungis er mögulegt að fá aðgang að áritanakerfinu með sérstakri löggjöf sem þarf samþykki meirihluta bæði í fulltrúa- og öldungadeild bandaríska þingsins.
Til þess að frumvarp verði að lögum þarf það fyrst að hljóta kosningu í fulltrúadeildinni og í framhaldi af því fer frumvarpið til meðferðar og kosningar í öldungadeild þingsins.
