Íslendingar eru við það að verða 350 þúsund talsins.
Samkvæmt tölum Hagstofunnar voru landsmenn samtals 348.450 1. janúar síðastliðinn og hafði fjölgað um 10.101 frá því á sama tíma árið 2017, eða um 3%. Konum fjölgaði um 2,1 prósent, voru 170.850, en körlum fjölgaði um 3,8 prósent, voru 177.600. Þetta kemur fram í mannfjöldatölum sem birtar voru á vef Hagstofunnar í dag.
Hlutfallslega varð mest fólksfjölgun á Suðurnesjum, 7,4% en talsverð fólksfjölgun var líka á höfuðborgarsvæðinu þar sem íbúum fjölgaði um 5.606 í fyrra eða 2,6%.
Einnig fjölgaði íbúum á Suðurlandi (4,6%), Norðurlandi eystra (2,6%), Austurlandi (2,4%) og Vesturlandi (2%), en minna á Vestfjörðum (1,8%) og Norðurlandi vestra (0,5%),“ segir á vef Hagstofunnar.
Í þéttbýli bjuggu 330.559 og fjölgaði um 13.655 á milli ára en í dreifbýli og smærri byggðakjörnum bjuggu 22.048.
Miðað við mannfjöldaspá Hagstofunnar í fyrrahaust má gera ráð fyrir að landsmenn verði orðnir 400 þúsund í kringum 2025.
