Ef horft til veðbanka þá virðist Ísland ekki vera „litla liðið“ í lokakeppni Evrópukeppni landsliða í knattspyrnu í Frakklandi næsta sumar að því er fram kemur í samantekt á mbl.is í morgun. Íslenska liðið þykir þó ekki líklegt til að vinna keppnina en margar þjóðir eru taldar síður líklegar.
Mbl.is tók stikkprufu á þremur veðbönkum - og er hér stuðst við frétt miðilsins:. Ef fyrst er horft til William Hill, eins elsta starfandi veðbankans sem komið var á fót árið 1934, að þá er Ísland þar í 17. - 19. sæti ásamt Írlandi og Úkraínu. Liðin sem þykja slakari eru Slóvakía sem Ísland mætti í vikunni, Albanía, N-Írland og Ungverjaland þykir síst líklegt til að vinna keppnina en er liðið þó í þriðja styrkleikaflokki þegar dregið verður í riðla. Stuðullinn á Ísland er 80 sem þýðir að upphæðin áttatíufaldast ef veðjað er á að Ísland vinni keppnina og sú verði niðurstaðan. Stuðullinn á Ungverjaland er hins vegar 500 til samanburðar.
Hjá Bet365 sem margir Íslendingar nota er þessi stuðull 81. Þar er Ísland í 15. - 18. sæti ásamt Tyrkjum sem voru með okkur Íslendingum í riðli í undankeppninni, Svíum og Úkraínumönnum. Sex þjóðir eru þá fyrir neðan Ísland. Sömu fimm og hjá William Hill ásamt Írlandi.
Hjá Betsson er stuðullinn á Ísland: 75. Þar er Ísland í 15. - 17. sæti ásamt Tékklandi og Tyrklandi. Þessi þrjú lið voru einmitt öll saman í riðli í undankeppninni. Sömu sex þjóðir eru fyrir neðan Ísland hjá Betsson eins og Bet365, segir ennfremur orðrétt í samantekt mbl.is í morgun.
