Ný skýrsla sýnir að Noregur þénar hundruð milljarða á innflytjendum. Þar með er hrakin mýta um hið öndverða, að innflytjendur séu baggi á kerfinu. Svo segir í norskum fréttum sem birst hafa um skýrsluna. Umræðan er kunnugleg Íslendingum.
Öfgafullar pólitískar stjórnmálahreyfingar hafa í Noregi árum saman reynt að halda þeim málflutningi á lofti að af innflytjendum stafi bæði efnahagsleg og menningarleg ógn, segir í norskum fréttum um skýrsluna. Meðal niðurstaðna nýju skýrslunnar eru að vegna hins háa atvinnustigs í Noregi og vöntunar á starfsmönnum séu innflyttjendur lykilþáttur í Noregi. Menntunarstig þeirra sé hærra að jafnaði en meðal innfæddra og ýmis annar samanburður s.s. atvinnuþátttaka sé innflytjendum hagstæður, auk þess sem minnsti hluti opinbers velferðarstuðnings renni innflytjendum í skaut.
Síðastliðinn mánudag fór fram á Alþingi sérstök umræða um hagræn áhrif af komu flóttamanna og innflytjenda til Íslands. Kom þar meðal annars fram eins og vitnað var til í fréttaskýringaþættinum Kvikan á Hringbraut, að frumkvöðla- og nýsköpunarstarfsemi er margfalt meiri í hópi innflytjenda hér innanlands en meðal innfæddra. Flest bendir til að harðduglegt fólk komi til Íslands til að sjá sér farborða, en í Kvikunni á Hringbraut sagði Þórunn Ólafsdóttir, sjálfboðaliði við björgun sýrlenskra flóttamanna á Lesbos, að mestu varðaði að innflytjendur og flóttamenn finni að þeir séu velkomnir hingað til lands. Þeir séu í leit að friði og lífsviðurværi.
Lesa má um norsku skýrsluna hér.
