Í frétt RÚV um málið í hádeginu, sem hér er vitnað til, er forsaga málsins rifjuð upp, en fyrirtækið Ferskar kjötvörur reyndi að flytja 83 kíló af frosnum nautalundum til landsins í febrúar 2014. Fyrirtækið var ekki með vottorð um að kjötið hefði verið geymt í frystigeymslu í 30 daga áður en það var flutt til landsins og fyrir vikið fékkst kjötið ekki tollafgreitt og var því fargað. Fyrirtækið höfðaði þá skaðabótamál gegn ríkinu en innkaupsverðið á kjötinu nam tæpum 2000 evrum eða nærri 300 þúsund krónum að núvirði.
Við meðferð málsins fyrir héraðsdómi var kallað eftir ráðgefandi áliti EFTA-dómstólsins á því hvort íslensku reglurnar standist EES-samninginn. Stjórnvöld hafa haldið því fram að óheft viðskipti með landbúnaðarvörur geti ekki átt við gagnvart Íslandi þar sem sameiginleg landbúnaðarstefna ESB falli ekki undir EES-samninginn. Auk þess að taka beri tillit til einangraðrar legu Íslands og hugsanlegra afleiðinga þess ef smitsjúkdómar bærust með hráu kjöti í búfjárstofna hér á landi. Dómstóllinn hafnaði þeim sjónarmiðum og Sigurður Ingi Jóhannsson landbúnaðarráðherra segir við RÚV að það séu vonbrigði: \"Ég tel það vera áhyggjuefni fyrir góða stöðu smitsjúkdóma hjá búfjárstofnun Íslands ef það er þannig að við getum ekki gripið til nokkurra ráða á grundvelli EES samningsins og verja þessa sérstöku stöðu sem landfræðileg einangrun landsins skapar“.
Álit EFTA-dómstólsins verður nú lagt til grundvallar í skaðabótamálinu sem rekið er fyrir héraðsdómi. Niðurstaðan þar ræður framhaldinu: \"Ráðgefandi álitið afnemur engar gildandi reglur á Íslandi þannig að það leiðir af því að innflutningur verður ekki sjálfkrafa heimill við þetta. Það sem við þurfum að gera núna og höfum sett af stað nú þegar er að sérfræðingum ráðuneytanna er falið að greina dóminn og meta á hvaða viðbrögð hann kalli gangi dómur innlendra dómstóla á sama veg, sem við eigum eftir að sjá“ segir Sigurður Ingi við RÚV í tilefni af niðurstöðu EFTA-dómstólsins.
