Inga Sæland segir fyrirhugaða breytingu Svandísar „sérhagsmunagæslu fyrir kvótakónga“

„Fyrirhugaðar breytingar sjávarútvegsráðherra um að taka upp svæðaskiptingu á kvóta strandveiðanna á nýjan leik er atlaga að brothættum sjávarbyggðum landsins,“ segir Inga Sæland, formaður Flokks fólksins og bætir við að ákvörðunin sé óskiljanleg.

Þetta kemur fram í aðsendri grein Ingu í Morgunblaðinu í dag.

Að sögn Ingu fordæmir Flokkur fólksins þessar hugmyndir Svandísar Svavarsdóttur, matvælaráðherra.

„Flokk­ur fólks­ins minn­ir á að strand­veiðikerf­inu var komið á af hálfu rík­is­stjórn­ar til að bregðast við áliti Mann­rétt­inda­nefnd­ar Sam­einuðu þjóðanna, sem taldi kvóta­kerfið brjóta á mann­rétt­ind­um sjó­manna. Sjáv­ar­út­vegs­ráðherra er með fyr­ir­huguðum breyt­ing­um að ganga gegn jafn­ræði til veiða sem strand­veiðunum var ætlað að tryggja,“ segir Inga jafnframt og heldur áfram: „ Ráðherr­ann vill ganga hér svo miklu mun lengra í sér­hags­muna­gæslu fyr­ir kvótakónga en nokk­urn skyldi gruna. Að sama skapi er ein­beitt­ur vilji ráðherr­ans að ganga frek­lega gegn hags­mun­um strand­veiðisjó­manna og brot­hætt­um sjáv­ar­byggðum.“

Inga segir baráttu fyrir frjálsum strandveiðum vera mannréttindabaráttu, baráttu fyrir atvinnufrelsi og búseturétti. Þá megi takmarkanir á atvinnufrelsi ekki ganga lengra en nauðsyn krefur og gæta verður að meðalhófi og jafnræði.

„Sjáv­ar­út­vegs­ráðherra ger­ir það ekki með því að taka aft­ur upp svæðaskipt­ingu og út­hluta afla á hvert svæði. Þar er ein­ung­is verið að deila og drottna og valda tog­streitu á milli svæða. For­sæt­is­ráðherra, sem skreyt­ir sig sem bar­áttu­mann fyr­ir mann­rétt­ind­um, hef­ur ekki lyft fingri þegar kem­ur að rétt­ind­um íbúa sjáv­ar­byggðanna til strand­veiða. Þar hafa mátt­laus dygðaskreyt­inga­lög sætt for­gangi, sem lík­lega mun aldrei reyna á,“ segir Inga og bætir við að Flokkur fólksins berjist fyrir frjálsum handfæraveiðum.

Að sögn Ingu eru strandveiðar grundvöllur fyrir tilvist sjávarbyggðanna í kringum landið. „Al­gjört lág­mark er að sú sátt sem náðist á síðasta kjör­tíma­bili um nú­ver­andi strand­veiðikerfi með 48 daga til veiða sé tryggð.“

Þá ítrekar Inga að frjálsar strandveiðar muni aldrei ógna lífríkinu í kringum landið.

Hægt er að lesa grein Ingu í heild sinni hér.