InDefence-hópurinn gagnrýnir þá leið stjórnvalda að bjóða slitabúum föllnu bankanna að mæta stöðugleikaskilyrðum og klára nauðasamninga sína gegn því að sleppa undan álagningu stöðugleikaskatts.
Gagnrýni hópsins er nokkuð athyglisverð í ljósi þess að forsætisráðherra og nánustu samstarfsmenn hans voru innstu koppar í búri hans á árunum eftir efnahagshrunið 2008.
InDefence-hópurinn, sem hefur skilað inn umsögn sinni um frumvarp fjármálaráðherra um stöðugleikaskatt, bendir á að sú leið að semja um að mæta stöðugleikaskilyrðum feli í sér lægri greiðslur frá slitabúunum til ríkissjóðs en álagning stöðugleikaskatts, sem yrði 39 prósent á allar eignir búanna. Þess í stað vilji hópurinn að tryggt verði í frumvörpum til laga um stöðugleikaskatt og nauðasamninga fjármálafyrirtækja að samningar um mætingu stöðugleikaskilyrða skili jafn miklu í ríkiskassann og stöðugleikaskattur, en að teknu tilliti til frádráttarliða ætti hann að geta skilað 682 milljörðum króna í tekjur fyrir ríkið leggist hann á.
Mat á því hversu miklu samkomulag um að mæta stöðugleikaskilyrðum stjórnvalda skilar er mjög mismunandi. Bjarni Benediktsson, fjármála- og efnahagsráðherra hefur talað um 450 milljarða króna. Sérfræðingar sem vefmiðillinn Kjarninn fékk til að reikna út mögulegar tekjur sögðu að þær yrðu líkast til á bilinu 300 til 400 milljarðar króna. Aðrir hafa komist að hærri niðurstöðu. Hver endanleg fjárhæð verður mun þó ekki liggja fyrir fyrr en búið verður að selja viðskiptabankanna tvo, Íslandsbanka og Arion banka, sem eru í eigu slitabúa föllnu bankanna og endanlegt virði krafna sem framseldar verða til stjórnvalda verður ljóst.
