Illa komið ef menntun er stríð um fé

Björn Þorláksson skrifar

3. apríl 2016 kl. 08:55

Fréttir & pistlar

Jóhannes Þór Skúlason, aðstoðarmaður Sigmundar Davíðs Gunnlaugssonar forsætisráðherra, segir vegna umræðu sem upp kom á dögunum eftir að Háskóli Íslands ákvað að hætta íþróttakennaranámi á Laugarvatni og forsætisráðherra brást þannig við að landsathygli vakti, að fjárveitingalega halli á Háskólann á Akureyri miðað við Háskóla Íslands. Brýnt sé að hafa háskóla á Akureyri. Þetta kemur fram í viðtali sem nemendur við fjölmiðlafræðideild Háskólans á Akureyri tóku við Jóhannes Þór og birtist á fréttasíðu fjölmiðlanema, Landpóstinum eða landpostur.is. Fyrirsögn viðtalsins er: Erum í vondum málum ef menntakerfið er stríð um peninga\".

\"Það sem Sigmundur sagði var að ef að það væri svona sem færi fyrir þessum skólum úti á landi þyrfti að dæla peningum í þá beint til þess að þeir gætu þróast á sínum eigin forsendum, ekki til þess að hvetja til samstarfs við HÍ,\" segir Jóhannes Þór.

\"Þessir skólar sem hafa verið að fá þessa háskólastöðu eins og Háskólinn á Akureyri, Bifröst, Landbúnaðarháskólinn á Hvanneyri og háskólasetrin, þetta nám hefur verið að öðlast almenna virðingu í samfélaginu, og með þeirri þróun þá hefur sýn stjórnmálamanna skerpst á hversu mikilvægt sé fyrir þessi litlu samfélög úti á landi að hafa þessa háskólar, þeir hafa svo mikið fram að færa fyrir, leggja svo mikið til. Háskólinn á Akureyri er gríðarlega gott dæmi, vegna þess að Akureyri er náttúrulega stærsti byggðarkjarni landsins fyrir utan höfuðborgarsvæðið. Þar erum við með svæði sem þrátt fyrir þennan stóra byggðakjarna hefur verið láglaunasvæði á landinu, Eyjafjörðurinn. Það er náttúrulega ýmislegt sem þarf að gera til þess að breyta því og hefur reyndar verið að breytast aðeins, en það er ekki síst fyrir tilkomu Háskólans sem miklu meiri fjölbreytni er nú í atvinnulífi á þessu svæði en var. Ekki bara fyrir Akureyrabæ sem slíkan, heldur fyrir allt svæðið og Norðurland í heild sinni.”

Aðstoðarmaður forsætisráðherra segir að HA hafi ekki setið við sama borð fjárhagslega og HÍ.

“Fjárveitingar til skólans eru ennþá ekki nægilega miklar, að mati skólans að minnsta kosti og ég get alveg tekið undir það að yfirmenn Háskólans á Akureyri hafa töluvert til síns máls í því efni að þeir standi ekki jafnfætis til dæmis Háskóla Íslands, varðandi fjárveitingar gagnvart nemendafjölda og fleira. Þeir benda til dæmis á að Háskóli Íslands hafi fengið uppfærslu vegna aukins nemendafjölda. Það hefur Háskólinn á Akureyri ekki fengið.“

Hann segir einnig í viðtalinu við Landpóstinn: \"Ef við skoðum byggðarþróunina nýlega, þá er frekar algengt að framhaldsskólanám sé klárað nálægt heimahögum en þegar kemur að lengra námi eru möguleikarnir miklu takmarkaðri. Þess vegna skiptir máli að hafa val, eitthvað annað en Reykjavík. Fólk sem fer suður í háskólanám skilar sér illa til baka en þeir sem fara frá Akureyri í háskólanám eru töluvert líklegri að skila sér aftur. Þegar þú lítur til staða á Austur-, Vestur- og Suðurlandi, er verri heimting til baka. Partur af því er að atvinnulífið heima við í þessum litlu plássum er einsleitara en á Akureyri eða í Reykjavík. Háskólamenn tala um að það þurfi fleiri greinar í skólum úti á landi sem nýtist beint í atvinnulífinu í kring.”