Guðni Th. Jóhannesson, sagnfræðingur telur að það hafi verið rétt ákvörðun hjá Ólafi Ragnari Grímssyni að bjóða sig ekki fram til embættis forseta Íslands á nýjan leik.
\"Hann hefði getað boðið sig fram að nýju og hefði örugglega haft sigur en ég held að næsta kjörtímabil hefði getað reynst honum erfitt á ýmsa lund,“ segir Guðni á fréttavef Morgunblaðsins nú um helgina.
Hann bætir við að núna verði tuttugu ára forsetatíð Ólafs Ragnars vegin og metin. Erfitt sé samt að fá skýra mynd á tíð hans því hún sé ennþá full nærri okkur í tíma. Fjarlægðin breyti oft sjónarmiðum og niðurstöðum.
\"En það hafa skipst á skin og skúrir. Fyrst um sinn var hann hefðbundinn forseti á marga lund. Svo skipti hann um gír 2004 með því að synja fjölmiðlalögum staðfestingar og nýta þann rétt forseta í fyrsta sinn í sögunni,“ greinir Guðni frá á mbl.is. \"Þá voru líka að hefjast útrásarárin sem í sögunni verða kannski Ólafi erfiðust því hann fór fram úr sjálfum sér, eins og hann hefur sjálfur viðurkennt, og mærði um of íslenska efnahagsundrið sem var reist á sandi eins og við vitum.“
Að mati Guðna hlaut Ólafur uppreisn æru eftir bankahrunið þegar hann synjaði Icesave-lögunum staðfestingar. \"Icesave var hans bjarghringur. Margir munu fyrirgefa honum allt annað fyrir það eitt að hafa leyft þjóðinni að eiga lokaorðið í þeim efnum.“
Aðspurður segir Guðni það vel mega vera að lögum um hámarkssetu forseta í embætti verði breytt eftir að Ólafur lætur af embætti: \"Það er einhugur innan þings og utan að í stjórnarskránni þurfi að breyta m.a. ákvæðum um hlutverk og völd forseta. Í frumvarpi stjórnlagaráðs er ákvæði um hámarkssetu forseta og kannski Ólafur verði okkar Franklin Roosevelt,“ segir hann. „Hann sat á forsetastól í Bandaríkjunum í tólf ár. Eftir það breyttu menn stjórnarskránni þannig að forseti getur aðeins setið tvö kjörtímabil. Kannski verður það raunin hérna líka,“ segir Guðni á mbl.is í dag.
