\"Þótt við höfum aukið markaðshlutdeildina okkar á Norður-Atlantshafinu á markaðnum milli Evrópu og Norður-Ameríku undanfarin ár erum við ennþá mjög smá í samanburði við stærstu flugfélögin og einungis með um 1% markaðshlutdeild.“
Þetta segir Birkir Hólm Guðnason, framkvæmdastjóri Icelandair, í viðtali í ViðskiptaMogganum í dag um sókn félagsins í farþegaflutningum. Flugfélagið fjárfestir mikið í markaðsstarfi erlendis til að koma Icelandair og Íslandi á kortið.
Félagið hefur verið framarlega í því að nota samfélagsmiðla í sínu markaðsstarfi og segir Birkir Hólm að nýjasta markaðsherferðin hafi náð til tæplega 700 milljóna manna: \"Það er mikilvægt að vera vel með á nótunum á samfélagsmiðlunum því þar eru í raun tækifæri fyrir lítið félag eins og Icelandair á þessum stóra markaði að koma sér á framfæri.“
Forráðamenn Icelandair stefna að því að auka framboð á flugferðum félagsins um 18% á næsta ári, en tvær 262 sætja 767-300 farþegaþotur bætast í flugflota félagsins árið 2016.
Vöxtur Icelandair á síðustu misserum hefur verið ævintýri líkastur og haldist í hendur við aukinn straum ferðamanna til landsins. Eftir því hefur verið tekið hvað félaginu hefur verið stýrt af mikilli ábyrgð og framsýni á þessum uppgangstímum sem, vel að merkja, getur verið jafn erfitt að höndla og þegar kreppir að.
Félagið hefur nánast undantekningalaust sprengt áætlanir sínar á síðustu árum - og er árið í ár þar engin undantekning, en farþegavöxturinn það sem af er ári er 17%. Ef fram fer sem horfir mun félagið flytja 3,1 milljón farþega á yfirstandandi ári, sem er metfjöldi í langri sögu félagsins.
Icelandair er nú að bæta við þremur nýjum áfngastöðum; Chicago í Bandaríkjunum, Montreal í Kanada og Aberdeen í Skotlandi og er búist við að flugferðum félagsins fjölgi um 14% á næsta ári og farþegar þess verði vart undir hálfri fjórðu milljón.
