Hveragerði hefur óskað eftir því við Sveitarfélagið Ölfus, sem umlykur bæinn, að spilda austan bæjarins verði færð undir lögsögu Hveragerðis. Sveitarfélagið Ölfus hefur hafnað beiðni um viðræður þar að lútandi. Bæjarráð Hveragerðis segir hagsmuni íbúa ekki hafða að leiðarljósi með höfnuninni.
Fréttablaðið greinir frá.
Í bókun bæjarráðs Hveragerðis vegna ákvörðunar bæjarráðs Ölfuss um að hafna viðræðum um færslu á mörkum sveitarfélaganna segir meðal annars: „Bæjarráð vill fullyrða að hagsmunir íbúa séu ekki hafðir að leiðarljósi þegar jafn afdráttarlaust er hafnað beiðni um viðræður um breytingu á sveitarfélagamörkum og hér hefur verið gert.“
Spildan austan Hveragerðis er handan við Varmá og liggur að fjallsrótum.
Í bókuninni kemur einnig fram að erindi um viðræður um breytinguna á mörkum sveitarfélaganna hafi upphaflega verið sent árið 2015 og lýsti bæjarráðið yfir miklum vonbrigðum með afstöðu bæjarfulltrúa Ölfusar við beiðninni.
„Það getur aldrei verið slæmt að ræða málin með það að markmiði að ná niðurstöðu sem allir geta sætt sig við. Það hafa bæjarfulltrúar Hveragerðisbæjar ítrekað gert þegar kemur að því að veita íbúum í dreifbýli Ölfuss þjónustu,“ segir ennfremur í bókuninni.
Þá rifja Hvergerðingar upp gerð samkomulags um að börnum í dreifbýli Ölfuss bjóðist leikskólapláss á leikskólum bæjarins til jafns við íbúa bæjarins og segir í bókuninni að það samkomulag hafi verið gert með hagsmuni íbúa að leiðarljósi. Því óski bæjarráð Hveragerðis enn eftir endurupptöku á málinu í sveitarstjórn Ölfuss í þeirri von að farsæl lausn finnist sem fyrst.
Í svari bæjarráðs Ölfuss segir að í erindi frá í maí 2016 hafi Hveragerði óskað „eftir því að land sem hingað til hefði tilheyrt Sveitarfélaginu Ölfusi yrði afhent Hveragerði. Sams konar erindi hafi verið rætt á fundi bæjarstjórnar Ölfuss í júní 2015.
„Þar fékk málið þá afgreiðslu að miðað við þau gögn og forsendur sem fyrir lágu sæi bæjarstjórn ekki möguleika á því að verða við því. Bæjarstjórn ítrekaði vilja til áframhaldandi góðs samstarfs og sá ekki núverandi sveitarfélagamörk koma í veg fyrir það,“ segir einnig í svarinu. Þá segir að ekkert nýtt hafi komið fram sem kalli á endurskoðun á þessari afstöðu.
