Níu mánuðir eru liðnir síðan rúmlega 300 stjórnendur úr íslensku atvinnulífi skoruðu á Alþingi að lækka tryggingagjaldið. Eftir hrun var það hækkað úr 5,34 prósent í 8,65 prósent árið 2011 svo leggja mætti meira í atvinnuleysistryggingasjóð enda aukið atvinnuleysi á þessum tíma. Nú er gjaldið 6,85 og hefur ekki enn verið leiðrétt til fyrra horfs þótt hruntengt atvinnuleysi sé horfið. Tryggingagjaldið sem á eingöngu að fjármagna atvinnuleysi er því að safnast upp. Verður seilst í þann sjóð til að efna kosningaloforð? Verður það notað til að fjármagna lengra og bætt fæðingarorlof?
Stjórnendurnir benda á að enn sé tryggingagjaldið í hæstu hæðum vegna atvinnuleysis sem sé horfið. Árlegt gjald sé um 20 til 25 milljörðum króna hærra en það ætti að vera. Flest fyrirtæki á Íslandi eru lítil og meðalstór. Gjaldið er byrði sem verður til þess að ekki sé hægt að greiða hærri laun eða bæta við starfsfólki.
Þá kemur fram í tölum um greiðsluafkomu ríkisstjóðs að gjaldið sem íslensk fyrirtæki greiddu í ríkissjóð hafi verið 42,3 milljarðar króna á fyrri helmingi ársins 2016 og var 5,4 prósent umfram áætlun.
Almar Guðmundsson, framkvæmdastjóri Samtaka iðnaðarins ræðir þetta á Hringbraut í kvöld.
