Birna Einarsdóttir, bankastjóri Íslandsbanka, segir í Morgunblaðinu í dag að hún hafi gert athugasemdir við að aðeins hafi staðið til að boða fimm karla í viðtal í tengslum við ráðningu nýs forstjóra Borgunar.
Hún hafi hvatt stjórn félagsins til þess að ræða við fleiri einstaklinga þar sem hún hefði haft vitneskju um að öflugar konur hefðu sótt um starfið einnig. Birna hafnar því að afskipti sín af ferlinu hafi verið óeðlileg.
Þá hafnar Birna því að sú ákvörðun að endurnýja ekki umboð Erlendar Magnússonar, stjórnarformanns Borgunar, á aðalfundi sem haldinn verður um miðjan mars, tengist fyrrnefndu ráðningarferli.
