All margir hjúkrunarfræðingar sem sögðu upp í miðri kjaradeilu Félags íslenskra hjúkrunarfræðinga við ríkið eru byrjaðir að skila sér til baka eftir úrskurð kjaradóms sem kom verulega til móts við kröfur stéttarinnar.
Almennt virðast hjúkrunarfræðingar heldur sáttir við úrskurðinn með kveður á um samning til fjögurra ára, en á þeim tíma hækka launin um vel á þriðja tug prósenta sem er nokkuð umfram það sem ríkið bauð á sínum tíma.
Sigríður Gunnarsdótttir, framkvæmdastjóri hjúkrunar á Landspítalanum segir við Morgunblaðið í dag að engar nákvæmar tölur liggja fyrir um þá sem hafi snúið aftur til starfa, en flestar uppsagnir taka gildi 1. október: \"Þetta kemur víða inn og satt best að segja hefur verið ró yfir þessu öllu. Fólk kynnir sér nú hvað felst í þessu, einhverjir hafa dregið uppsagnir sínar til baka, en alls ekki allir. Fólk ígrundar þetta í rólegheitum,“ segir hún við blaðið.
