Hrafn fær ekki að stækka lóð sína

Kvikmyndaleikstjórinn Hrafn Gunnlaugsson fær ekki að innlima í lóð sína skika undir svokölluðum hörgi nærri íbúðarhúsi hans í Laugarnesi, að því er fram kemur á fréttavefnum visir.is í dag.

Þar segir að Hrafn hafi senti umsókn um miðjan janúar til Reykjavíkurborgar um að fá að stækka lóð sína á Laugarnestanga 65. Sagði hann það vera vegna hörgs „sem merktur var ásum og vönum þann 1. júní 2015 af Hilmari Erni Hilmarssyni allsherjargoða“. Hörgur er blótstaður heiðinna manna.

Ekki náðist í Hrafn en í umsókn hans kemur fram að hörgurinn skarti líkneski af ásnum Frey. „Allsherjargoðinn hefur síðan framkvæmt þar ýmsar helgar athafnir ásatrúar,“ upplýsir leikstjórinn.