Birgitta Jónsdóttir, þingmaður Pírata, segir í athugasemd við skrif Egils Helgasonar fjölmiðlamann að ríkisstjórn framsóknarmanna og sjálfstæðismanna njóti einskis trausts.
Í bloggi Egils segir að hann telji að tvennt geti leitt til fylgistaps hjá Pírötum en þeir fara nú með himinskautum og hafa lengi gert í skoðanakönnunum, eru langvinsælasti flokkur landsins. Annað atriðið sem kunni að verða Pírötum að falli sé að þeim “mistakist illilega að raða upp á framboðslista”. Hitt sé sú yfirlýsing Birgittu að ef Píratar komist til valda verði kjörtímabilið stutt. “Á landsfundi Pírata í ágúst síðastliðnum var samþykkt að það myndi snúast um tvö mál: Stjórnarskrána í útgáfu stjórnlagaráðs og þjóðaratkvæðagreiðslu um Evrópusambandið.
Birgitta svarar Agli í athugasemd og segir að fjárlög séu alltaf stærsta pólitíska ákvörðun hverrar ríkisstjórnar sem sýni hvar hinar pólitískur áherslur liggja:
“Að lofa að gera of mikið og svíkja svo loforðin er það sem hefur fengið að viðgangast hérlendis alla tíð. Okkur langar til að breyta því. Að ganga til kosninga með nákvæma útlistun og bindandi samkomulag á því sem þeir flokkar sem vilja vinna saman eftir kosningar ætla sér að gera ef þeir fá umboð er ný aðferðarfræði hérlendis. Að laga grunninn til að hægt sé að byggja kerfi á nýjum forsendum er lykilatriði ef takast á að breyta einhverju hérna til framtíðar. Fleiri og fleiri átta sig á því að við værum ekki enn og aftur komin í þá stöðu að sitja uppi með stjórn sem nýtur einskis trausts og gerir bara það sem henni sýnist, ef nýrrar stjórnarskrár nyti við,” skrifar Birgitta ómyrk í máli og sparar ekki gagnrýni sína á ríkisstjórn Sigmundar Davíðs.
“Það að ætla að fara inn í kjörtímabil með óframkvæmanleg loforð er bara ekki í boði lengur. Það liggja inni á þingi 4 frumvörp um húsnæðismál. Það er mikilvægt að þau nái fram að ganga. Neyðarástand er víða í samfélaginu og nauðsynlegt að vinna að mótun nýrra leiða til að komast út úr því króníska vandamáli sem skammtímamarkmið leiða til. Þjóðin þarf að fá tækifæri til að koma saman í þá vegferð. Vandleg yfirferð um það hvernig skal breyta kerfunum er nauðsynleg. Ef við ætlum að bæta í á einum stað þá þarf að hagræða á öðrum, það þarf að vera samtakamáttur um það. Nú þegar höfum við samþykkt sjávarútvegsstefnu sem getur stuðlað að jafnari dreifingu á þeirri auðlind sem við höfum aðgang að í sjónum. Nú þegar hefur verið samþykkt stefna um þunna fjármögnun. Þó svo Píratar setji þessi tvö mál á oddinn þýðir það ekki að aðrar aðgerðir séu ekki í undirbúningi.”
Birgitta endar svar sitt á: “Það sem skiptir miklu máli að ekki sé ákveðið að ráðast strax í er of mörg stór mál sem munu mæta mikilli andstöðu þeirra sem hafa alltaf getað gengið að völdum og auðlindum okkar. Píratar vilja að fólk geti tekið upplýstar ákvarðanir. Til þess að það sé hægt þurfa forsendur að liggja fyrir. Þær forsendur liggja enn ekki allar fyrir því að það er hulinshjúpur um allt of margt í stjórnsýslunni sem er orðin of mikið bákn fyrir svona lítið samfélag. Það að laga það hörmungarástand sem hefur fengið að grassera gagnvart gömlu fólki og sjúku þarnast þjóðarátaks sem mér sýnist vera að takast fyrir tillstuðlan mjög öflugra einstaklinga sem láta sig þessi mál varða. Nauðsynlegt er að bregðast við því núna og ekki nóg að veita bara fé heldur þarf líka að endurskoða hagræðingarkröfur sem leiða til einkavæðingar á grunnþjónustuþáttum.”
