Drífa Snædal, framkvæmdastjóri Starfgreinasambandsins rifjar upp í viðtali á Hringbraut í kvöld að hatrömm kjarabarátta hafi átt sér stað um að lágmarkslaun yrðu hækkuð í 300 þúsund krónur. Hún segir að henni sýnist að höfrungahlaup sé hafið hjá æðstu stjórnendum ríkisins, þeir elti hvorn annan í launahækkunum. Eftir hrun hafi launahækkanir verið frystar en nú sé að „þiðna“ og stjórnendur vilji fá hækkanir eins og gerist á almennum vinnumarkaði hjá stjórnendum þar. Hún gagnrýnir aðallega að viðmiðin við launahækkanirnar séu mjög óljós og ógagnsæ. Því þurfi fyrst og fremst að breyta. \"Hvernig er aukið álag og ábyrgð metin hjá kjararáði\", spyr Drífa í viðtali á Hringbraut í kvöld en sumir stjórnendur hafa beðið um launahækkun vegna mikils álags í starfi, t.a.m. forstjóri Útlendingastofnunar.
Hækkun launa nokkurra forstöðumanna ríkisstofnanna og nefndarformanna um tugi prósenta hefur vakið reiði og furðu. Launin hækka um tugi prósenta umfram þær hækkanir sem kjararáð hafði þegar ákveðið með almennri ákvörðun um áramót.
Drífa segir að skoða verði hvort að forsendurbrestur hafi orðið gagnvart SALEK samkomulaginu eða kjarasamningum.
Hækkanirnar koma ofan á 7,15 prósenta almenna launahækkun sem tók gildi 1. júní.
Fréttablaðið segir frá því í dag að kjararáð, hafi ákveðið að hækka laun ríkislögreglustjóra, landlæknis, formanns kærunefndar útlendingamála, skólastjóra Lögregluskóla ríkisins, forstjóra Útlendingastofnunar, forstjóra Fangelsismálastofnunar og forstjóra Barnaverndarstofu um tugi prósenta. Þetta eru þá laun frá 1,2 milljónum á mánuði til 1,6 milljónar eftir hækkunina.
Mest hækka laun formanns kærunefndar útlendingamála, Hjartar Braga Sverrissonar, um tæplega 50 prósent frá og með 1. desember 2014, rúmlega eitt og hálft ár aftur í tímann. Hækkanirnar eru afturvirkar hjá sumum allt til ársins 2014 en aðrar afturvirkar til 2015 eða ársbyrjun 2016.
