Jón Óðinn Waage, júdómaður og þekktur pistlahöfundur, sem býr í Svíþjóð, gefur lítið fyrir þá greiningu nýs utanríkisráðherra, Lilju Alfreðsdóttur að Ísland hafi ekki orðið fyrir ímyndarskaða erlendis vegna skattaskjólsmála og aðildar ráðherra hér að þeim. Lilja hélt þessu fram í samtölum við fjölmiðla í gær.
Jón Óðinn segir að gærdagurinn hafi mjög markast af viðbrögðum Svía við þeim atburðum sem hér hafa orðið.
\"Í kvöld var ég að kenna tíma í líkamsræktarstöðinni þar sem ég vinn. Fólkið fór að grínast með hvort ég ætti ekki peninga í skattaskjóli. Síðan fóru nokkrir að herma eftir fyrrverandi forsætisráðherra og uppskáru almennan hlátur. Þegar ég kom heim og opnaði tölvuna blasti við mér frétt um að utanríkisráðuneytið teldi að \"ímynd og ásýnd Íslands á alþjóðavettvangi hafi ekki beðið umtalsverðan hnekki\". Ég hló upphátt þegar ég las þetta, dýrðlegt,\" segir Jón Óðinn.
Fleiri Íslendingar, búsettir í útlöndum, hafa talað á svipuðum nótum.
Hallgrímur Óskarsson ráðgjafi segir um niðurstöðu utanríkisráðuneytisins að ekki hafi orðið skaði að sumt kunni að hafa jákvæð áhrif í fréttaflutningi s.s. það sem snúi að viðbragði almennings en annað sé augljóslega neikvætt. Í færslu á facebook segir Hallgrímur sem komið hefur að ímyndarmálum stórra fyrirtækja: \"Aftur á móti hefur ímynd nokkurra þátta versnað eins og ímynd spillingar, ímynd Íslands sem frumstæðs lýðræðisþjóðfélags (stundum nefnt „bananalýðveldi”) og einnig hefur ímynd trausts pólitísks trúverðugleika versnað. Þess vegna er það alrangt að ímynd Íslands sé óbreytt og í góðu lagi. Miklu nær er að ræða málið á þeim nótum að sumir ímyndarþættir hafi styrkst en aðrir veigameiri þættir veikst og því hafi ímynd Íslands því farið niðurávið í heild á þessari rúmri viku sem liðin frá því að lætin hófust.
Ekki síður var það furðulegt að lesa hvað utanríkisráðuneytið ætlaði að gera til að laga ímynd Íslands með með greinaskrifum eða viðtölum en að mínu mati er ólíklegt að slíkt muni hafa teljandi áhrif af því að grunnvandamálið snýst um skort á trúverðugleika stjórnmálamanna. Þess vegna er þeirra innlegg ekki líklegt til að hreyfa við þeirri ímynd sem mótast hefur í hugum íbúa nágrannalandanna. Ekki síst vegna þess að ímyndin hefur mótast á vinsælum kanölum t.d. í vinsælum og gagnrýnum grínþáttum sem fyrirhuguð viðtöl og greinarskrif utanríkisráðuneytisins ná ekki til.
Áætlun utanríkisráðuneytisins er eins og að segja í kjölfar bankahrunsins: Við ætlum að láta bankamennina skrifa nokkrar greinar og láta taka viðtöl við þá og þá verður allt (líklega) í besta lagi.\"
