Veðurfræðingar klóra sér í kollinum yfir fordæmalausri hitabylgju sem hefur breiðst yfir norðurheimskautið og staðið í heila viku. Tunga úr þessu hlýja lofti teygir sig nú suður yfir Ísland. Á sama tíma hellist heimskautakuldi yfir stóran hluta Evrópu og Rússland.
Viðlíka hiti hefur ekki mælst á pólsvæðinu í febrúarmánuði síðan a.m.k. á sjötta áratugnum. Þannig hefur hitastigið farið upp yfir frostmark á norðlægustu veðurstöð heims á Morris Jesup höfða nyrst á Grænlandi samtals níu daga í febrúarmánuði.
Sunnudaginn 25. febrúar var hitinn yfir frostmarki í 24 tíma, sem þekkist nánast ekki í febrúarmánuði þegar sólin nær ekki uppfyrir sjóndeildarhringinn. Og hafís hefur beinlínis dregist saman á Bering sundi og norður af Grænlandi í febrúar sem er sá árstími þegar hafísþekjan nær alla jafnan hámarki.
Svona varmainnskot - þar sem tiltölulega hlýtt og rakt loft þyrlast með stormum inn á pólsvæðið - eru svo sem ekki óþekkt á Norðurhjaranum. En þessi veðuratburður er þó engu öðru líkur.
\"Ég held að við getum sagt að þessi atburður sé án fordæma í gögnum okkar, bæði hvað varðar stærð hitasveiflunnar og varanleika,\" er haft eftir Ruth Mottram veðurfræðingi hjá dönsku veðurstofunni. \"Hitametið á Morris Jesup höfða hefur að vísu ekki fallið núna eins og gerðist í mun styttri svona hitasmelli 2011, en svona langvarandi hlýindi hafa aldrei sést áður,\" segir hún.
Veðurfræðingar telja hugsanlegt að ein ástæðan fyrir þessu sé sú að lægðabrautin á Norður Atlantshafinu hafi verið að færast eftir því sem ísbrúnin hefur færst sífellt norðar.
Í sérstakri athugun veðurgagna í fyrra kom í ljós að atburðir af þessu tagi eru nú fleiri og lengri en áður um leið og loftslag hlýnar tvöfalt hraðar á norðurslóðum en annars staðar á jarðkringlunni.
