Stjórnkerfis-og lýðræðisráð tók til starfa eftir síðustu borgarstjórnarkosningar, en formaður þess er Halldór Auðar Svansson, borgarfulltrúi Pírata. Sjálfstæðismenn í borginni telja ráðið vera lið í meirihlutasamkomulagi þeirra flokka sem nú eru við völd en kostnaður við ráðið í ár er um átján milljónir, að því er fram kemur í frétt RÚV um málið í gærkvöld.
Hildur Sverrisdóttir, fulltrúi Sjálfstæðisflokksins í ráðinu, segir í tillögu sinni að stærsti kostnaðurinn við stjórnkerfis- og lýðræðisráð séu nefndarstörfin - hann hlaupi á milljónum sem borgarsjóður eigi ekki til. Engin þörf sé á því að halda úti sérstöku ráði til að hafa eftirlit með því \"umfram aðra til þess bærra aðila innan borgarkerfisins sem geta haldið þeim markmiðum á lofti í þeim verkefnum sem ráðið hefur nú á sinni könnu.“
Meirihlutinn felldi tillöguna en samþykkti þó að færa ráðið niður um flokk og spara þannig rekstrarkostnað.
