Útbreiðsla þorsks er nú meiri en í mörgum fyrri stofnmælingum Hafró skv. ralli í mars. Góður þorskafli fékkst á stöðvum allt í kringum landið. Mest fékkst af þorski utarlega á landgrunninu, frá Víkurál norður og austur um að Hvalbakshalla.
Stofnvísitala þorsks mælist svipuð og fyrir ári en þá var metár. Vísitölur síðustu tveggja ára eru þær hæstu frá upphafi rannsóknanna árið 1985, meira en tvöfalt hærri en árin 2002-2008.
Hækkun vísitölunnar má einkum rekja til aukins magns af stórum þorski. Í ár var vísitala allra lengdarflokka stærri en 45 cm yfir meðaltali alls rannsóknatímabilsins en minna mældist af 25-40 cm þorski sem rekja má til lítils árgangs frá 2013. Mikið var af loðnu í mögum þorsks út af Breiðafirði, Vestfjörðum, Húnaflóa við Norðausturland og suðurströndina. Af annarri fæðu má helst nefna kolmunna, síld, síli og ýmsar tegundir fiska og krabbadýra.
Þetta kemur fram í kynningu Hafrannsóknastofnunar úr stofnmælingu botnfiska á Íslandsmiðum 2016. Fjögur skip tóku þátt í verkefninu; rannsóknaskipin Árni Friðriksson og Bjarni Sæmundsson og togararnir Bjartur NK og Ljósafell SU. Togað var með botnvörpu á tæplega 600 stöðvum allt í kringum landið, alls tóku um 90 manns þátt í verkefninu.
Helstu markmið eru að fylgjast með breytingum á stærð, útbreiðslu og líffræðilegu ástandi botnlægra fiskistofna og hitastigi sjávar á landgrunninu.
