Helgi Hrafn hjólar í Guðmund: „Svo arfaslakur að það er ekki verjandi að kjósa ekki gegn honum“

Helgi Hrafn Gunnars­son, þing­maður Pírata, er harð­orður í garð Guð­mundar Frank­líns Jóns­sonar for­seta­fram­bjóðanda í færslu sinni á Face­book. Hann greinir frá því að hann hafi ekki kosið Guðna Th. Jóhannes­son í síðustu for­seta­kosningum en ætli sér að gera það núna.

„Bæði hefur hann farið með for­seta­valdið af stakri hóf­semi og yfir­vegun, en einnig er hinn kosturinn svo arfaslakur að það er ekki verjandi að kjósa ekki gegn honum,“ segir Helgi um valið en bætir við að honum leiðist fátt meira en að tala fólk niður og á­kvað því að rök­styðja skoðun sína.

Sjá einnig: Guð­mundur Frank­lín kok­hraustur: „Ég er ekki að fara tapa þessum kosningum“

Að mati Helga þarf for­seti að geta myndað sér skoðanir og hafa hug­rekki til að tjá þær auk þess sem hann þarf að geta dregið rök­réttar á­lyktanir út frá að­gengi­legum upp­lýsingum og rök­fræði. „Á því sviði hefur Guð­mundur Frank­lín sýnt bæði getu- og metnaðar­leysi. Hann virðist ein­fald­lega taka því fyrsta sem honum dettur í hug sem aug­ljósum sann­leika ef það passar við heims­myndina hans,“ segir Helgi.

Hann bætir þó við að það þýði ekki endi­lega að Guð­mundur hafi alltaf rangt fyrir sér heldur þurfi for­seti ein­fald­lega að sækja sér upp­lýsingar og draga frá þeim á­lyktanir og krefst það auð­mýktar, yfir­vegunar, sann­leik­þorsta og rök­festu að sögn Helga.

„Að þessu leyti minnir pólitískur stíll Guð­mundar Frank­lín ó­neitan­lega á stíl Donalds Trumps, sem kemur ekki á ó­vart miðað við að Guð­mundur Frank­lín hefur opin­ber­lega lýst yfir stuðningi við þann dæma­lausa vit­leysing og hrotta,“ segir Helgi enn fremur og bætir við að slíkar týpur líti sem svo á að skoðanir séu jafn­gildar stað­reyndum.

Sjá einnig: Ný könnun: Guðni með yfirburði – Stuðningsmenn Donald Trump styðja Guðmund

Þá virðast sömu týpur, að mati Helga, þarfnast þess að raun­veru­leikinn að­lagi sig skoðunum þeirra. „Við þurfum for­seta sem getur dregið rök­réttar á­lyktanir, þjáist af brennandi sann­leiks­þorsta og sýnir yfir­vegun, rök­festu og auð­mýkt gagn­vart valdi sínu.“

„Eins og ég sagði í upp­hafi finnst mér fátt leiðin­legra en að tala fólk niður, en þarna er ein­stak­lingur að sækjast eftir völdum og því verður að ræða hvernig hann kemur til með að fara með þau völd. Það er aug­ljóst að Guð­mundur Frank­lín kæmi til með að fara mjög illa með for­seta­valdið,“ segir Helgi.

„Í stuttu máli blasir við að for­seta­tíð Guð­mundar Frank­lín myndi ein­kennast af dóm­greindar- og á­byrgðar­leysi, fljót­færni, ofur­ein­földunum og skeytingar­leysi gagn­vart stað­reyndum. Það er ekkert í lagi hvernig þannig stjórn­mál hafa verið að færa sig upp á skaftið síðustu ár. Eina leiðin til að tryggja að þannig stjórn­mál festist ekki í sessi, er með því að sem flestir kjós­endur mæti á kjör­stað og kjósi eitt­hvað annað.“